ആശുപത്രികൾക്ക്​ പകരം യു.പി സർക്കാർ ശ്​മശാനങ്ങളുടെ ശേഷിയാണ്​ വികസിപ്പിക്കുന്നത്; രൂക്ഷവിമർശനവുമായി പ്രിയങ്ക ഗാന്ധി

ഉത്തർപ്രദേശിൽ കോവിഡ്​ ബാധിതരുടെ എണ്ണം കുതിച്ചുയരുന്ന സാഹചര്യത്തിൽ യോഗി ആദിത്യനാഥ്​ സർക്കാരിനെതിരെ രൂക്ഷ വിമർശനവുമായി കോൺഗ്രസ്​ നേതാവ്​ പ്രിയങ്ക ഗാന്ധി. ആശുപത്രികൾക്ക്​ പകരം യു.പി സർക്കാർ ശ്​മശാനങ്ങളുടെ ശേഷിയാണ്​ വികസിപ്പിക്കുന്നതെന്ന്​ പ്രിയങ്ക ഗാന്ധി പറഞ്ഞു. സംസ്ഥാനത്തെ ജനങ്ങൾക്ക്​ എല്ലാവിധ സഹായങ്ങളും നൽകാൻ കോൺഗ്രസ്​ തയ്യാറാണെന്നും അവർ കൂട്ടിച്ചേർത്തു. രോഗവ്യാപനം രൂക്ഷമായ സാഹചര്യത്തിൽ  സംസ്​ഥാനത്തെ കോൺഗ്രസ്​ നേതാക്കളുമായി നടത്തിയ അടിയന്തര കൂടിക്കാഴ്ചയിൽ സംസാരിക്കുകയായിരുന്നു അവർ.

സംസ്ഥാനത്തിന്‍റെ എല്ലാ ഭാഗങ്ങളിൽ നിന്നും പുറത്തുവരുന്ന വാർത്തകൾ സങ്കടപ്പെടുത്തുന്നതും ഞെട്ടിക്കുന്നതുമാണ്​. എല്ലാ വഴികളിലൂടെയും ജനങ്ങളെ ദുരന്തത്തിൽ നിന്ന്​ രക്ഷിക്കാൻ കോൺഗ്രസ്​ പിന്തുണയ്ക്കും. കൊറോണ വൈറസ്​ ബാധിതരായവർക്ക്​ മികച്ച ചികിത്സ ഉറപ്പാക്കാൻ സർക്കാർ തയ്യാറാകണമെന്നും പ്രിയങ്ക ഗാന്ധി പറഞ്ഞു.

കൊറോണ വൈറസ്​ മഹാമാരി പടർന്നുപിടിച്ചതു മുതൽ യു.പി സർക്കാർ ഉണർന്നു പ്രവർത്തിക്കുകയാണെങ്കിൽ ഇന്ന്​ ഇത്തരമൊരു അവസ്ഥ കാണേണ്ടി വരില്ലായിരുന്നു. തുടക്കം മുതൽ മികച്ച ആരോഗ്യസംവിധാനം പ്രവർത്തിച്ചിരുന്നെങ്കിൽ രോഗബാധിതരുടെ എണ്ണവും മരണനിരക്കും കുറയ്ക്കാൻ കഴിയുമായിരുന്നു. കോവിഡിനെ നേരിടാൻ സർക്കാരിന്​ കൃത്യമായ പദ്ധതികളില്ലെന്നും യോഗി ആദിത്യനാഥ്​ സർക്കാർ കോവിഡ്​ പ്രതിരോധത്തിൽ പരാജയപ്പെട്ടതായും കോൺഗ്രസ്​ നേതാക്കൾ പ്രതികരിച്ചു.

യു.പിയിൽ 20,000ത്തിൽ അധികം പേർക്കാണ്​ പ്രതിദിനം കോവിഡ്​ സ്ഥിരീകരിക്കുന്നത്​. കഴിഞ്ഞദിവസം 20,510 പേർക്ക്​ രോഗം സ്ഥിരീകരിച്ചു. 67 മരണവും റിപ്പോർട്ട്​ ചെയ്​തിരുന്നു.