ഇന്ത്യയിലെ ദശലക്ഷക്കണക്കിന് പൗരന്മാരെ അന്യവൽക്കരിക്കുന്ന തരത്തിൽ ഇന്ത്യയെക്കുറിച്ച്‌ “തീവ്രവാദപരവും തികച്ചും വൈകാരികവുമായ” ആശയം കെട്ടിപ്പടുക്കുന്നതിന് ദേശീയതയും “ഭാരത് മാതാ കി ജയ്l എന്ന മുദ്രാവാക്യവും ദുരുപയോഗം ചെയ്യുന്നുവെന്ന് മുൻ പ്രധാനമന്ത്രി മൻമോഹൻ സിംഗ് ശനിയാഴ്ച പറഞ്ഞു.
ജവഹർലാൽ നെഹ്‌റുവിന്റെ കൃതികളെയും പ്രസംഗങ്ങളെയും കുറിച്ചുള്ള ഒരു പുസ്തകത്തിന്റെ പ്രകാശന ചടങ്ങിൽ സംസാരിച്ച ഡോ. മൻമോഹൻ സിംഗ്, അന്താരാഷ്ട്ര സമൂഹത്തിൽ ഇന്ത്യയെ ഊർജ്ജസ്വലമായ ജനാധിപത്യമായി അംഗീകരിച്ചിട്ടുണ്ടെങ്കിൽ, ഇന്ത്യയെ ഒരു പ്രധാന ലോകശക്തിയായി കണക്കാക്കപ്പെടുന്നുവെങ്കിൽ, ഇന്ത്യയുടെ ആദ്യത്തെ പ്രധാനമന്ത്രിയായിരിക്കണം അതിന്റെ പ്രധാന വാസ്തുശില്പിയായി അംഗീകരിക്കപ്പെടേണ്ടത് എന്ന് പറഞ്ഞു.
രാജ്യം അസ്ഥിരവും രൂപവത്കരണത്തിന്റെ ഘട്ടത്തിലും ഇരിക്കെ വ്യത്യസ്ത സാമൂഹിക രാഷ്ട്രീയ കാഴ്ചപ്പാടുകൾ ഉൾക്കൊള്ളുന്ന ഒരു ജനാധിപത്യ രീതി സ്വീകരിച്ചുകൊണ്ട് ജവഹർലാൽ നെഹ്‌റു ഈ രാജ്യത്തെ നയിച്ചു എന്ന് മൻമോഹൻ സിംഗ് പറഞ്ഞു.
ഇന്ത്യൻ പൈതൃകത്തെക്കുറിച്ച് വളരെയധികം അഭിമാനിച്ചിരുന്ന ഇന്ത്യയുടെ ആദ്യത്തെ പ്രധാനമന്ത്രി അത് സ്വാംശീകരിക്കുകയും പുതിയ ആധുനിക ഇന്ത്യയുടെ ആവശ്യങ്ങളുമായി യോജിപ്പിക്കുകയും ചെയ്തു, അദ്ദേഹം പറഞ്ഞു.
ആധുനിക ഇന്ത്യയിലെ സർവ്വകലാശാലകൾ, അക്കാദമികൾ, സാംസ്കാരിക സ്ഥാപനങ്ങൾ എന്നിവയുടെ അടിത്തറ ഇട്ടത് അനുകരണീയമായ ശൈലിക്കുടമയായിരുന്ന ബഹുഭാഷാ പണ്ഡിതനായിരുന്ന നെഹ്‌റുവാണ്. നെഹ്‌റുവിന്റെ നേതൃത്വമില്ലായിരുന്നെങ്കിൽ സ്വതന്ത്ര ഇന്ത്യ ഇന്നത്തെ അവസ്ഥയായിരിക്കില്ലെന്നും ഡോ. സിംഗ് പറഞ്ഞു.
“നിർഭാഗ്യവശാൽ, ചരിത്രം വായിക്കാൻ ക്ഷമയില്ലാത്തവരോ മുൻവിധികളാൽ മനപ്പൂർവ്വം നയിക്കപ്പെടാൻ ആഗ്രഹിക്കുന്നവരോ ആയ ഒരു വിഭാഗം ആളുകൾ നെഹ്‌റുവിനെ തെറ്റായ വെളിച്ചത്തിൽ ചിത്രീകരിക്കാൻ പരമാവധി ശ്രമിക്കുന്നു. എന്നാൽ എനിക്ക് ഉറപ്പുണ്ട്, വ്യാജവും തെറ്റായതുമായ ഗൂഡാലോചനകൾ നിരസിക്കാനും എല്ലാം ശരിയായ വീക്ഷണകോണിൽ ഉൾപ്പെടുത്താനും ചരിത്രത്തിന് കഴിവുണ്ട്, ”അദ്ദേഹം പറഞ്ഞു.
Read more
പുരുഷോത്തം അഗർവാളും രാധാകൃഷ്ണനും എഴുതിയ “ഹൂ ഈസ് ഭാരത് മാതാ” എന്ന പുസ്തകത്തിൽ നെഹ്‌റുവിന്റെ ക്ലാസിക് പുസ്തകങ്ങളായ ആത്മകഥ, ലോകചരിത്രത്തിന്റെ നേർക്കാഴ്ചകൾ, ഇന്ത്യയെ കണ്ടെത്തൽ; സ്വാതന്ത്ര്യത്തിനു മുമ്പും ശേഷവുമുള്ള അദ്ദേഹത്തിന്റെ പ്രസംഗങ്ങൾ, ഉപന്യാസങ്ങൾ, കത്തുകൾ; അദ്ദേഹത്തിന്റെ ചില അഭിമുഖങ്ങളും അടങ്ങിയിരിക്കുന്നു. ഇത് ആദ്യം ഇംഗ്ലീഷിലാണ് പുറത്തുവന്നത്, ഇപ്പോൾ അതിന്റെ കന്നഡ വിവർത്തനവും പുറത്തിറങ്ങി.
