വോട്ടിംഗ് മെഷീനില്‍ തിരിമറി നടക്കുന്നുണ്ടെന്ന ആക്ഷേപം നിലനില്‍ക്കെ ഉത്തര്‍പ്രദേശ്, ബിഹാര്‍, ഹരിയാന എന്നിവിടങ്ങളില്‍ കടകളിലും വാഹനത്തില്‍ നിന്നുമൊക്കെയായി ഇവിഎം കണ്ടെത്തിയത് വിവാദമായിരുന്നു. ഇപ്പോഴിതാ സംഭവത്തില്‍ തിരഞ്ഞെടുപ്പ് കമ്മീഷനെ വിമര്‍ശിച്ച് രംഗത്തെത്തിയിരിക്കുകയാണ് മുന്‍ മുഖ്യ തിരഞ്ഞെടുപ്പു കമ്മീഷണര്‍ എസ്.വൈ ഖുറേഷി. തിരഞ്ഞെടുപ്പു കമ്മീഷന്റെ ഭാഗത്ത് വീഴ്ചയുണ്ടായെന്ന് അദ്ദേഹം പറഞ്ഞു.
ഇ.വി.എം സൂക്ഷിക്കേണ്ടതു സംബന്ധിച്ച് തിരഞ്ഞെടുപ്പു കമ്മീഷന് കൃത്യമായ ചട്ടങ്ങളുണ്ടെന്നും ആ ചട്ടങ്ങള്‍ പാലിക്കപ്പെട്ടില്ലെന്നും അദ്ദേഹം ട്വിറ്ററിലൂടെ വ്യക്തമാക്കി. സുരക്ഷിതത്വമില്ലാതെ മെഷീനുകള്‍ എവിടെയെങ്കിലും കണ്ടെത്തിയിട്ടുണ്ടെങ്കില്‍ അതൊരിക്കലും അംഗീകരിക്കാന്‍ കഴിയാത്ത കാര്യമാണെന്നും ഖുറേഷി പിന്നീട് ഇന്ത്യാ ടുഡേയോടു പറഞ്ഞു.
“വോട്ടെടുപ്പ് പൂര്‍ത്തിയായശേഷം എല്ലാ ഇ.വി.എമ്മുകളും, വോട്ടെടുപ്പിന് ഉപയോഗിച്ചതും അല്ലാത്തതും, എല്ലായ്പ്പോഴും സായുധ സേനയുടെ സംരക്ഷണത്തിലായിരിക്കണമെന്നാണ് ഇ.വി.എം സൂക്ഷിക്കുന്നതുമായി ബന്ധപ്പെട്ട തിരഞ്ഞെടുപ്പു കമ്മീഷന്റെ ചട്ടത്തില്‍ പറയുന്നതെന്ന് അദ്ദേഹം ചൂണ്ടികാട്ടി.
“പോള്‍ ചെയ്ത ഇ.വി.എമ്മുകള്‍ സ്ട്രോംഗ് റൂമില്‍ സൂക്ഷിക്കുന്ന സമയത്തു തന്നെ ബാക്കി വന്ന എല്ലാ ഇ.വി.എമ്മുകളും ഇ.വി.എം സൂക്ഷിക്കുന്നതിനുള്ള സ്ട്രോംഗ് റൂമിലേക്ക് മാറ്റണം” എന്നും അദ്ദേഹം വിശദീകരിക്കുന്നു.
Read more
പോളിംഗ് ഓഫീസര്‍മാരുടെ ഭാഗത്തു നിന്നും വീഴ്ചകളുണ്ടാവാമെന്നും വീഴ്ച വരുത്തിയ ഉദ്യോഗസ്ഥര്‍ക്കെതിരെ തിരഞ്ഞെടുപ്പു കമ്മീഷന് കര്‍ശന നടപടിയെടുക്കണമെന്നും അദ്ദേഹം ആവശ്യപ്പെട്ടു.
