2060 -ഓടെ പുരുഷന്മാരുടെ പ്രത്യുത്പാദനശേഷി നിലയ്ക്കുമോ ?

കഴിഞ്ഞ അമ്പതുകൊല്ലം കൊണ്ട് വടക്കേ അമേരിക്ക, യൂറോപ്പ്, ഓസ്‌ട്രേലിയ, ന്യൂസിലാന്റ്  ഇവിടങ്ങളിൽ  പുരുഷന്മാരുടെ ബീജശേഷി 50% കുറഞ്ഞതായി കണ്ടെത്തൽ. ഈ സ്ഥിതി തുടർന്നാൽ 2060 ഓടെ സംഭവിക്കുന്നത് പൂർണ പുരുഷ വന്ധ്യതയായിരിക്കുമെന്നാണ് മുന്നറിയിപ്പ്.

ജറുസലേമിലെ ഹീബ്രു യൂണിവേഴ്സിറ്റിയിൽ നടന്ന പഠനങ്ങളെ ഉദ്ധരിച്ച്  സ്‌കോട്ട്ലൻഡ്  ഡൻഡീ  യൂണിവേഴ്സിറ്റിയിലെ  റീ പ്രൊഡക്ടീവ് മെഡിസിൻ പ്രൊഫസറായ  ക്രിസ് ബാരെറ്റിന്റേതാണ് വെളിപ്പെടുത്തൽ. ഗവേഷണ നിലവാരത്തിന്റെ കാര്യത്തിൽ വ്യക്തതയില്ലാത്തതിനാൽ ഇക്കാര്യത്തിൽ ആദ്യദശകങ്ങളിൽ വിഭിന്ന അഭിപ്രായങ്ങളാണ്  ഉണ്ടായിരുന്നത്. എന്നാൽ കൂടുതൽ പരിശോധനകൾക്കു ശേഷം വിദഗ്ദ്ധർ പഠനത്തെ അംഗീകരിക്കുകയാണ്.

അതേസമയം ഏഷ്യ, തെക്കേ അമേരിക്ക, ആഫ്രിക്ക എന്നിവിടങ്ങളിൽ 42,935 പേരിൽ നടത്തിയ പഠനങ്ങളിലാകട്ടെ ഇതുപോലൊരു പ്രശ്നം റിപ്പോർട്ട് ചെയ്തില്ല.

വൃഷണത്തിലെ കാൻസർ ഒരു കാരണമാകുന്നുണ്ടോ  എന്ന് പരിശോധിച്ചെങ്കിലും 0.4 % മാത്രമാണ് ഈ രോഗത്തിന്റെ ശതമാനം.  മാത്രമല്ല 95 % രോഗമുക്തിയും രേഖപ്പെടുത്തിയിട്ടുണ്ട്. പാരിസ്ഥിതിക പ്രശ്നങ്ങളാണ് പ്രധാന കാരണമായി ഇപ്പോൾ കണക്കാക്കപ്പെടുന്നത്. സ്ത്രീഭ്രൂണത്തെ അപേക്ഷിച്ച് പുരുഷ ഭ്രൂണം ചുറ്റുപാടിന് കൂടുതൽ വഴങ്ങിക്കൊടുക്കുന്നതാണെന്നുള്ള കണ്ടെത്തലും ഇതിനോട് ചേർത്ത് വായിക്കാം.

പുരുഷവന്ധ്യതയ്ക്ക് കാരണമായ  ടോക്സിക് കെമിക്കൽസിൽ നിന്നും പരമാവധി അകന്നുനിൽക്കുകയും പുകവലി വർജ്ജിക്കുകയും ചെയ്യുക എന്നതാണ് ഇപ്പോൾ ഡോക്ടർമാർ നിർദ്ദേശിക്കുന്നത്.  1960 മുതൽ പ്ലാസ്റ്റിക്കുകളും റെസിനുകളും നിർമ്മിക്കാൻ ഉപയോഗിക്കുന്ന രാസവസ്തുവായ ബിസ്ഫിനോൾ എ ( (CH₃)₂C(C₆H₄OH)₂) ആണ് പ്രധാന വില്ലൻ. കൂടാതെ ആസ്ബെസ്റ്റോസ്, ബെൻസീൽ ബെൻസോയേറ്റ്, ബ്യാസ്‌ഫെനോൾ എസ്, DEHP, എൻഡോക്രൈൻ ഡിസ്‌റപ്റ്റുകൾ, ഫോർമാൽഡിഹൈഡ്, ഈയം, പോളിബ്രോമിനേറ്റഡ് ഡൈഫിനൈൽ ഈതറുകൾ, പാരബീനുകൾ, പോളിഫ്ലൂറോ ആൽക്കൈൽ പദാർത്ഥങ്ങൾ, പെരിഫ്‌ളൂറിനേറ്റഡ് കെമിക്കലുകൾ, വോളറ്റൈൽ ഓർഗാനിക് കെമിക്കലുകൾ ഇവയെല്ലാം അപകടകാരികൾ തന്നെ.