ശ്രീനാരായണ ഗുരുവിന്റെ കഴുത്തില് കയറിട്ട് നിന്ദിച്ചപ്പോള് അതിനെ ആവിഷ്കാര സ്വാതന്ത്ര്യം എന്ന് പറഞ്ഞവര് ബിഷപ്പിനെതിരായ കാര്ട്ടൂണ് വരച്ചപ്പോള് നിലപാട് മാറ്റിയെന്ന് എസ്.എന്.ഡി.പി യോഗം ജനറല് സെക്രട്ടറി വെള്ളാപ്പള്ളി നടേശന്. ഗുരുവിനെ നിന്ദിച്ചപ്പോഴും സീതയേയും ഹനുമാനേയും മോശമായി അവതരിപ്പിച്ചപ്പോഴും രാഷ്ട്രീയക്കാരും സാഹിത്യകാരന്മാരും അത് ആവിഷ്കാര സ്വാതന്ത്ര്യമാണ് എന്നാണ് പറഞ്ഞത് എന്നാല് ബിഷപ്പിനെ തൊട്ടപ്പോള് മതത്തെ തൊട്ടുള്ള ആവിഷ്കാര സ്വാതന്ത്ര്യം വേണ്ടെന്ന് പറയുന്നത് എന്ത് അടിസ്ഥാനത്തിലാണെന്നും വെള്ളാപ്പളളി ചോദിച്ചു.
ബിഷപ്പ് ഫ്രാങ്കോയുടെ കാര്ട്ടൂണ് വരച്ചപ്പോള് ചിത്രം മാറി. മതത്തെ തൊട്ട് ആവിഷ്കാര സ്വാതന്ത്ര്യം വേണ്ടെന്ന് മന്ത്രിക്ക് തന്നെ പറയേണ്ടി വന്നു. ഇത് രണ്ടും പറയുന്നത് ഒരേ വിപ്ലവക്കാരാണ്. നമ്മള് സംഘടിതരോ ശക്തരോ വോട്ട് ബാങ്കോ അല്ലാത്തതാണ് ഈ ഇരട്ടത്താപ്പിന് കാരണമെന്നും വെള്ളാപ്പള്ളി പറഞ്ഞു.ഇത് വോട്ട് ബാങ്ക് രാഷ്ട്രീയമല്ലാത വേറെ എന്താണെന്നും വെള്ളാപ്പള്ളി ചോദിച്ചു.
പീഡനക്കേസില് പ്രതിയായ ബിഷപ്പ് ഫ്രാങ്കോയെ കഥാപാത്രമാക്കി വരച്ച, ലളിത കലാ അക്കാദമി പുരസ്കാരം നേടിയ കാര്ട്ടൂണാണ് വിവാദമായത്. ക്രിസ്തീയ മത പ്രതീകങ്ങളെ അവഹേളിക്കുന്നതാണെന്ന് ചൂണ്ടിക്കാട്ടി കെ.സി.ബി.സി യായിരുന്നു ആദ്യം രംഗത്തെത്തിയത്.
എന്നാല് രാജാവിനെക്കാളും വലിയ രാജഭക്തി കാണിച്ച് മന്ത്രി എ. കെ ബാലന് ഒരു മുഴം കൂട്ടി എറിഞ്ഞു. വിമര്ശനങ്ങളുടെ അടിസ്ഥാനത്തില് സര്ക്കാര് കാര്ട്ടൂണ് പരിശോധിച്ചുവെന്നും ആ കാര്ട്ടൂണ് മതചിഹ്നങ്ങളെ അവഹേളിക്കുന്നതാണെന്ന് സര്ക്കാര് വിലയിരുത്തിയെന്നുമായിരുന്നു മന്ത്രി എ.കെ ബാലന് പ്രതികരിച്ചത്.
Read more
കെ.കെ സുഭാഷിന്റെ “വിശ്വാസം രക്ഷതി” എന്ന പേരിലെ കാര്ട്ടൂണാണ് സഭയെ ചൊടിപ്പിച്ചത്. സ്ത്രീ പീഡകര്ക്കും അവരെ പിന്തുണയ്ക്കുന്നവര്ക്കുമുള്ള വിമര്ശനമായിരുന്നു കാര്ട്ടൂണ്.