സിപിഎമ്മിനെ രൂക്ഷമായി വിമര്‍ശിച്ച് പ്രതിപക്ഷ നേതാവ് വി ഡി സതീശന്‍. രക്തസാക്ഷികളെയുണ്ടാക്കി സമരം തിരിച്ചുവിടാനാണ് സിപിഎമ്മിന്റെ ശ്രമമെന്നും കന്റോണ്‍മെന്റ് വസതിയിലേക്ക് അതിക്രമിച്ച് കയറിയ ഡിവൈഎഫ്‌ഐ പ്രവര്‍ത്തകര്‍ക്ക് മുഖ്യമന്ത്രി പറഞ്ഞത് കൊണ്ടാണ് ജാമ്യം ലഭിച്ചതെന്നും അദ്ദേഹം ആരോപിച്ചു.
സിപിഎം പ്രവര്‍ത്തകര്‍ വ്യാപകമായി ആക്രമണം നടത്തുകയാണ്. തന്റെ സ്വകാര്യതയിലേക്ക് കടന്ന് കയറി. ഡിവൈഎഫ്ഐക്ക് സ്ത്രീധനം കിട്ടിയതാണോ തിരുവനന്തപുരം എന്നും വി ഡി സതീശന്‍ ചോദിച്ചു. ഇതെല്ലാം സര്‍ക്കാരിന്റെ അറിവോടെയാണ് നടക്കുന്നത്. അവരുടെ വെല്ലുവിളി ഏറ്റെടുക്കുന്നു. കെപിസിസി ഓഫീസിലേക്കുള്ള അതിക്രമം പ്രതിരോധിക്കും. വിമാനത്തിലെ പ്രതിഷേധത്തെ കുറിച്ച് കെപിസിസി നേതൃത്വത്തിനോ യൂത്ത് കോണ്‍ഗ്രസ് നേതൃത്വത്തിനോ അറിയില്ലായിരുന്നുവെന്നും പ്രതിപക്ഷ നേതാവ് വ്യക്തമാക്കി.
മുഖ്യമന്ത്രിക്കെതിരെ വിമാനത്തില്‍ വധശ്രമം ഉണ്ടായി എന്നാണ് എല്‍ഡിഎഫ് കണ്‍വീനര്‍ ഇ പി ജയരാജന് ആരോപിക്കുന്നത്. അദ്ദേഹത്തിന്റെ ആരോപണം അടിസ്ഥാനരഹിതമാണെന്നും മുഖ്യമന്ത്രിയുടെ ഗണ്‍മാനെ കൊണ്ട് കൊടുത്ത പരാതി വ്യാജമാണെന്നും സതീശന്‍ പറഞ്ഞു. ജയരാജനാണ് യൂത്ത് കോണ്‍ഗ്രസ് പ്രവര്‍ത്തകരെ ആക്രമിച്ചത്. സിപിഎമ്മും ഗുണ്ടകളുെ ചേര്‍ന്ന് സമരത്തെ അടിച്ചമര്‍ത്താന്‍ ശ്രമിക്കുകയാണ്. ജയരാജന് എതിരെ നടപടിയെടുക്കണമെന്നും വി ഡി സതീശന്‍ ആവശ്യപ്പെട്ടു.
Read more
അതേസമയം യൂത്ത് കോണ്‍ഗ്രസ് പ്രവര്‍ത്തകരുടെ വിമാനത്തിലെ പ്രതിഷേധം അനാവശ്യമായിരുന്നെന്നും അത് നേതൃത്വത്തിന്റെ അറിവോടെയല്ല നടന്നതെന്നും കെ പി സി സി അധ്യക്ഷന്‍ കെ സുധാകരനും പ്രതികരിച്ചിരുന്നു. പ്രതിഷേധത്തെ ന്യായീകരിക്കില്ലെന്നും എന്നാല്‍ പ്രവര്‍ത്തകരെ തള്ളിപ്പറയില്ലെന്നും അദ്ദേഹം വ്യക്തമാക്കി.
