കാലാവര്ഷം എത്തുന്നതിന് മുന്നോടിയായി സംസ്ഥാനത്ത് അതിതീവ്ര മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ്. സംസ്ഥാനത്തെ പത്ത് ജില്ലകളില് മഴമുന്നറിയിപ്പ് പുറപ്പെടുവിച്ചു. എറണാകുളം, ഇടുക്കി ജില്ലകളില് റെഡ് അലര്ട്ട് പ്രഖ്യാപിച്ചിരിക്കുകയാണ്. 24 മണിക്കൂറില് 204.5 മില്ലിമീറ്ററില് കൂടുതല് മഴ ലഭിക്കുമെന്നാണ് സൂചന.
കൊല്ലം, പത്തനംതിട്ട, ആലപ്പുഴ, കോട്ടയം, ജില്ലകളില് ഓറഞ്ച് അലര്ട്ട് ആണ് പ്രഖ്യാപിച്ചിട്ടുള്ളത്. തിരുവനന്തപുരം, തൃശ്ശൂര്,മലപ്പുറം,കോഴിക്കോട് ജില്ലകളില് യെല്ലോ അലര്ട്ടും പ്രഖ്യാപിച്ചു. ഇടിമിന്നലിനും കാറ്റിനും സാധ്യതയുണ്ട്. കാലവര്ഷത്തെ തുടര്ന്ന് പടിഞ്ഞാറന് കാറ്റിന്റെ ഗതി മാറുന്നതും അറബിക്കടലില് നിന്നും മേഘങ്ങള് കേരളത്തിന് മുകളിലേക്ക് എത്തുകയും ചെയ്യുന്നതിനാല് ഇനിയുള്ള ദിവസങ്ങളില് ഇടിമിന്നലോടു കൂടിയ ശക്തമായ മഴയുണ്ടാകും. താഴ്ന്ന പ്രദേശങ്ങള്, നദീതീരങ്ങള്, ഉരുള്പൊട്ടല്, മണ്ണിടിച്ചില് സാധ്യതയുള്ള മലയോര പ്രദേശങ്ങള് തുടങ്ങിയ സ്ഥലങ്ങളില് ആളുകള് അതീവ ജാഗ്രത പാലിക്കണമെന്നും നിര്ദ്ദേശിച്ചിട്ടുണ്ട്.
Read more
27ന് കാലവര്ഷം ആരംഭിക്കാന് സാധ്യതയുണ്ടെന്നും കാലാവസ്ഥ നിരീക്ഷണ കേന്ദ്രം അറിയിച്ചു. ഈ മാസം 15ന് തെക്ക് കിഴക്കന് ബംഗാള് ഉള്ക്കടലിലും ആന്ഡമാന് കടലിലും കാലവര്ഷം എത്തും. സാധാരണയായി ആന്ഡമാനില് മേയ് 22നും കേരളത്തില് ജൂണ് ഒന്നിനുമാണു കാലവര്ഷം എത്തുന്നത്.