ഉത്തരക്കടലാസ് ചിതലരിച്ചു; ഒന്നര വര്‍ഷം മുമ്പ് നടത്തിയ പരീക്ഷകള്‍ വീണ്ടും നടത്താനൊരുങ്ങി പി.എസ്‌.സി

ഒന്നര വര്‍ഷം മുമ്പ് എഴുതിയ പരീക്ഷയുടെ ഫലപ്രഖ്യാപനത്തിന് കാത്തിരിക്കുന്ന ഉദ്യോഗാര്‍ത്ഥികള്‍ക്ക് തിരിച്ചടി. ഉത്തരക്കടലാസ് ചിതലരിച്ചു പോയതിനെ തുടര്‍ന്ന് വീണ്ടും രണ്ട് പരീക്ഷകള്‍ നടത്താന്‍ തീരുമാനിച്ചിരിക്കുകയാണ് പിഎസ്‌സി. എക്സൈസ് വകുപ്പിലെ വുമണ്‍ സിവില്‍ എക്സൈസ് ഓഫീസര്‍, വൊക്കേഷണല്‍ ഹയര്‍ സെക്കന്‍ഡറി വകുപ്പില്‍ ഇന്‍സ്ട്രക്ടര്‍ എന്നീ തസ്തികകളിലാണ് വീണ്ടും പരീക്ഷ നടത്തുക.

പി എസ് സി ആസ്ഥാനത്തെ ഭിത്തിയിലെ നനവ് മൂലമാണ് ഒന്നര വര്‍ഷം മുമ്പ് നടന്ന പരീക്ഷകളുടെ ഉത്തരക്കടലാസുകള്‍ ചിതലരിച്ചതെന്ന് അധികൃതര്‍ അറിയിച്ചു. പുതിയ തിയതി പിന്നീട് തീരുമാനിക്കുമെന്നും അധികാരികള്‍ വ്യക്തമാക്കി.

മൂല്യനിര്‍ണയം നടത്താതിരുന്നതിനാല്‍ പരീക്ഷയില്‍ റാങ്ക് ലിസ്റ്റില്‍ എത്തുമെന്ന് പ്രതീക്ഷയുള്ളവര്‍ക്ക് കടുത്ത നിരാശയേകുന്നതാണ് പുതിയ തീരുമാനം.