അമ്പലപ്പുഴ പാല്‍പ്പായസമെന്ന പേരില്‍ പായസം വില്‍പന നടത്തിയ ബേക്കറി ഉടമയെ കൊണ്ട് നിര്‍ബന്ധിച്ച് മാപ്പു പറയിപ്പിക്കുന്ന വീഡിയോ പുറത്ത്. തിരുവല്ല കടപ്രയിലുള്ള ജോളി ഫുഡ് പ്രൊഡക്ട്‌സിന്റെ ഉടമസ്ഥതയിലുള്ള തോംസണ്‍ ബേക്കറിയിലാണ് “അമ്പലപ്പുഴ പാല്‍പ്പായസം” എന്ന ലേബലൊട്ടിച്ച് പായസം വില്‍പന നടത്തിയത്.
സംഭവം വിവാദമായതോടെ ക്ഷമ ചോദിച്ചു കൊണ്ട് തോംസണ്‍ ബേക്കറി ഫെയ്‌സ്ബുക്കില്‍ കുറിപ്പിട്ടിരുന്നു. ഇതിന് പിന്നാലെയാണ് ബേക്കറി ഉടമയെ നിര്‍ബന്ധിച്ച് മാപ്പു പറയിപ്പിക്കുന്ന വീഡിയോ പുറത്തുവന്നത്.
“അമ്പലപ്പുഴ പാല്‍പ്പായസം, അതേ മോഡല്‍ എന്ന നിലയില്‍ ഞാന്‍ കഴിഞ്ഞ ദിവസം സ്വന്തമായി നിര്‍മിച്ച് വിറ്റു. അത് നിയമവിരുദ്ധമാണെന്ന് എനിക്ക് മനസ്സിലായി. അതുകൊണ്ട് ആ തെറ്റിന് ഞാന്‍ ക്ഷമ ചോദിക്കുന്നു. ഭക്തജനങ്ങള്‍ക്കുണ്ടായ എല്ലാവിധ വിഷമങ്ങള്‍ക്കും ഞാന്‍ നിരുപാധികം ക്ഷമ ചോദിക്കുന്നു. ഇനി ഞങ്ങളുടെ സ്ഥാപനം പാല്‍പ്പായസം ഈ ബ്രാന്‍ഡ് നെയിമില്‍ ഒരിക്കലും വില്‍ക്കുന്നതല്ല” എന്നിങ്ങനെ ഉടമയെ കൊണ്ട് പറയിപ്പിക്കുന്നതാണ് വീഡിയോ.
ഇത് ആരും നിര്‍ബന്ധിച്ചിട്ട് പറയുകയല്ലെന്നും സ്വന്തമായി പറയുന്നതാണെന്ന് കൂടി പറഞ്ഞോട്ടെയെന്ന് വീഡിയോ എടുക്കുന്നവരുടെ കൂട്ടത്തില്‍ നിന്ന് ഒരാള്‍ പറയുന്നതും വീഡിയോയില്‍ കേള്‍ക്കാം.
ബേക്കറിയില്‍ വില്‍പനയ്ക്ക് വെച്ചിരുന്ന പായസ പാത്രങ്ങളുടെ ദൃശ്യങ്ങള്‍ സമൂഹ മാധ്യമങ്ങളില്‍ പ്രചരിച്ചതോടെ ഇതിനെതിരെ വ്യാപകമായ എതിര്‍പ്പുയരുകയും സംഭവം വിവാദമാകുകയുമായിരുന്നു. അമ്പലപ്പുഴ പാല്‍പ്പായസമെന്ന പേരില്‍ ഭക്തരെ പറ്റിക്കാന്‍ ശ്രമിക്കുകയാണെന്ന് ആരോപിച്ച് തിരുവിതാംകൂര്‍ ദേവസ്വം ബോര്‍ഡ് അടക്കം രംഗത്തെത്തി.
ഇതോടെ തങ്ങളുടെ ഉത്പന്നങ്ങളിലൊന്നായ പാല്‍പ്പായസം അമ്പലപ്പുഴ പാല്‍പ്പായസം എന്ന് തെറ്റായി ലേബല്‍ ചെയ്തതാണെന്നും ഈ തെറ്റിന് ഞങ്ങള്‍ ക്ഷമ ചോദിക്കുന്നുവെന്നും തോംസണ്‍ ബേക്കറി അധികൃതര്‍ ഫെയ്സ്ബുക്ക് പേജിലൂടെ വ്യക്തമാക്കി.
പരാതിയുയര്‍ന്നതിനെ തുടര്‍ന്ന് ഇന്നലെ തന്നെ ബേക്കറി അധികൃതര്‍ പായസത്തിന്റെ ലേബലില്‍ നിന്ന് “അമ്പലപ്പുഴ” ഒഴിവാക്കിയിരുന്നു. അതേ സമയം അമ്പലപ്പുഴ പായസമെന്ന പേരില്‍ ബേക്കറിയില്‍ പായസം വില്‍പന നടത്തിയതിനെതിരെ നിയമനടപടികളുമായി നീങ്ങാനാണ് ദേവസ്വം ബോര്‍ഡിന്റെ തീരുമാനം.
ഇതു സംബന്ധിച്ച് ദേവസ്വം ബോര്‍ഡിന് ലഭിച്ച പരാതിയെ തുടര്‍ന്ന് ദേവസ്വം വിജിലന്‍സ് ഇന്നലെ ബേക്കറിയിലെത്തി പരിശോധന നടത്തുകയും പായസം വാങ്ങുകയും ചെയ്തിരുന്നു. അമ്പലപ്പുഴ പാല്‍പ്പായസമെന്ന പേരില്‍ അര ലിറ്ററിന് 175 രൂപ ഈടാക്കി വില്‍പന നടത്തുന്നതായി ബോദ്ധ്യപ്പെട്ട ദേവസ്വം വിജിലന്‍സ് വിവരം ദേവസ്വം ബോര്‍ഡിനെ അറിയിച്ചു.
Read more
തോംസണ്‍ ബേക്കറി ഉടമയെ നിബന്ധിപ്പിച്ച് മാപ്പു പറയിപ്പിക്കുന്ന വിഡിയോ
