ബസ് മോഷ്ടിച്ചുകൊണ്ടു പോകാനുള്ള ശ്രമം പരാജയപ്പെട്ടപ്പോൾ മോഷ്ടാവ് ബസിന്റെ താക്കോൽ കവർന്നു. റോഡരികിൽ നിർത്തിയിട്ടിരുന്ന കെഎസ്ആർടിസി ലോ ഫ്ലോർ ബസിന്റെ താക്കോലാണു മോഷ്ടിച്ചത്. തുടർന്ന് എറണാകുളം – ഫോർട്ട്കൊച്ചി റൂട്ടിൽ ബസ് നടത്തുന്ന സർവീസ് റദ്ദ് ചെയ്തു. ഇന്നലെ പുലർച്ചെ സർവീസ് ആരംഭിക്കാനായി ഡ്രൈവർ എത്തിയപ്പോഴാണു ബസിന്റെ താക്കോൽ നഷ്ടപ്പെട്ട വിവരം അറിയുന്നത്.
ഡിപ്പോയിൽ നിർമാണം നടക്കുന്നതിനാൽ ബസുകളിൽ ഭൂരിഭാഗവും റോഡരികിലാണു പാർക്ക് ചെയ്യുന്നത്. എങ്കിലും ഡ്രൈവർമാർ ബസിന്റെ താക്കോൽ ഊരിയെടുത്തു സൂക്ഷിക്കാറില്ല. റോഡരികിൽ കിടന്ന ബസ് കൊണ്ടുപോകാനുള്ള ശ്രമം പരാജയപ്പെട്ടതിനാലാകാം താക്കോലുമായി മോഷ്ടാവ് കടന്നതെന്നാണ് കെഎസ്ആർടിസി ജീവനക്കാർ പറയുന്നത്. ഇതോടെ ദുരിതത്തിലായത് എറണാകുളം ഭാഗത്തേക്കുള്ള യാത്രക്കാരാണ്.
Read more
ദിവസവും എന്തെങ്കിലും കാരണം പറഞ്ഞു മൂവാറ്റുപുഴ– എറണാകുളം റൂട്ടിലോടുന്ന ബസുകളുടെ സർവീസുകൾ റദ്ദ് ചെയ്യുന്ന അധികൃതർ, താക്കോൽ നഷ്ടപ്പെട്ടതോടെ ബസിന്റെ സർവീസ് റദ്ദ് ചെയ്തു. പ്രതിഷേധം ശക്തമായതോടെ വൈകുന്നേരത്തോടെ മറ്റൊരു താക്കോൽ എത്തിച്ചു സർവീസ് ആരംഭിച്ചു.