ബിഗ് ബോസ് സീസണ്‍ 13-ലെ പുതിയ ആശയം ഇന്ത്യന്‍ സംസ്‌കാരത്തിന് നിരക്കുന്നതല്ലെന്നും പരിപാടി നിരോധിക്കണമെന്നും ആവശ്യപ്പെട്ട് നടന്‍ സല്‍മാന്‍ ഖാന്റെ വീടിന് മുമ്പില്‍ പ്രതിഷേധം. “ബെഡ് ഫ്രണ്ട്സ് ഫോര്‍ എവര്‍” എന്ന പേരില്‍ മത്സരാര്‍ത്ഥികള്‍ പരസ്പരം കിടക്ക പങ്കിടുന്നതാണ് ടാസ്‌ക്. ആശയം ഇന്ത്യന്‍ സംസ്‌കാരത്തെ അപകീര്‍ത്തിപ്പെടുത്തുന്നതാണെന്നും അതിനാല്‍ പരിപാടി നിരോധിക്കണമെന്നുമാണ് കര്‍ണ്ണിസേനയുള്‍പ്പെടെയുള്ള പ്രതിഷേധക്കാരുടെ ആവശ്യം.
മുമ്പ് ബിഗ് ബോസിനെതിരേ വര്‍ഗീയ പ്രചാരണവും നടന്നിരുന്നു. ഷോയിലെ ഒരു ദൃശ്യത്തിന്റെ സ്‌ക്രീന്‍ഷോട്ട് പ്രചരിച്ചതിന് തൊട്ടു പിന്നാലെയാണ് ഒരു വിഭാഗം ഷോ ബഹിഷ്‌കരിക്കണമെന്ന ആഹ്വാനവുമായി എത്തിയത്. ഷോയിലെ മത്സരാര്‍ത്ഥികളായ മാഹിറ ശര്‍മയും അസീം റിയാസും ഒരു കിടക്കയില്‍ കിടക്കുന്ന ദൃശ്യങ്ങള്‍ എന്ന തരത്തിലാണ് ചിത്രങ്ങള്‍ പ്രചരിച്ചത്. തുടര്‍ന്ന് മുസ്ലിം പുരുഷനും ഹിന്ദു യുവതിയും കിടക്ക പങ്കിടുന്നത് ലൗ ജിഹാദാണെന്നും ഷോ ബഹിഷ്‌കരിക്കണമെന്നും ആവശ്യപ്പെട്ട് നിരവധി സംഘടനകള്‍ രംഗത്തുവന്നു.
Read more
എന്നാല്‍ യഥാര്‍ത്ഥത്തില്‍ ഈ ചിത്രം ഇവരുടേതായിരുന്നില്ല. ബിഗ് ബോസ് മുന്‍ മത്സരാര്‍ത്ഥികളായ സൂയാഷ് റായിയുടെയും കിഷ്വര്‍ മര്‍ച്ചന്റിന്റേതുമായിരുന്നു. ഇരുവരും ഷോ അവസാനിച്ചതിന് ശേഷം വിവാഹിതരായി.
