ജിയോ ബേബി സംവിധാനം ചെയ്ത “ദ ഗ്രേറ്റ് ഇന്ത്യന് കിച്ചന്” സോഷ്യല് മീഡിയയില് ചര്ച്ചയായിരിക്കുകയാണ്. ഒ.ടി.ടി പ്ലാറ്റ്ഫോമില് റിലീസിന് എത്തിയ ചിത്രത്തിന് മികച്ച പ്രതികരണമാണ് ലഭിക്കുന്നത്. കേരളത്തിലെ ഭൂരിഭാഗം വീടുകളുടെ അടുക്കളയില് എരിഞ്ഞു തീരുന്ന സ്ത്രീ ജീവിതങ്ങളാണ് ചിത്രത്തിലൂടെ സംവിധായകന് അവതരിപ്പിച്ചത്.
വിവാഹത്തിന് ശേഷം ഭര്ത്താവിന്റെ വീട്ടിലെ അടുക്കളയില് തളച്ചിടപ്പെട്ട പെണ്കുട്ടിയുടെ ജീവിതമാണ് ചിത്രത്തില് അവതരിപ്പിക്കുന്നത്. കൃത്യമായ രാഷ്ട്രീയമാണ് സിനിമ വിളിച്ചുപറയുന്നത്. വളരെ സൂക്ഷ്മതയോടെ കൈകാര്യം ചെയ്യേണ്ട വിഷയം കൃത്യമായി സധൈര്യം മുന്നോട്ട് വെച്ച ജിയോ ബേബി ചിത്രത്തെ കുറിച്ചുള്ള ചര്ച്ചകളാണ് സോഷ്യല് മീഡിയയില് നടക്കുന്നത്.
സുരാജ് വെഞ്ഞാറമൂടും നിമിഷ സജയനും ഒന്നിച്ച ചിത്രം മികച്ച അഭിപ്രായം നേടുന്നതിനൊപ്പം കുലപുരുഷന്മാരെയും കുലസ്ത്രീകളേയും അടച്ചാക്ഷേപിച്ച ചിത്രം ട്രോളന്മാരും ഏറ്റെടുത്തിരിക്കുകയാണ്. രസകരമായ ട്രോളുകളാണ് സോഷ്യല് മീഡിയയില് ഇപ്പോള് ട്രെന്ഡ് ആയിരിക്കുന്നത്.
വിവാഹം എന്ന് പറയുന്നത് ഒട്ടും നൈസര്ഗികമല്ലാതെ സംഭവിക്കുന്ന കാര്യമാണ്. സിനിമ കണ്ട ശേഷം നിരവധി സ്ത്രീകള് ഇത് തങ്ങളുടെ മുന്കാല ജീവിതമാണെന്ന് തുറന്നു പറഞ്ഞിട്ടുണ്ടെന്ന് ജിയോ ബേബി ഒരു അഭിമുഖത്തില് പറഞ്ഞിരുന്നു.