കെഎസ്ആര്‍ടിസി ബസില്‍ യാത്ര ചെയ്യുന്ന സന്തോഷ് പണ്ഡിറ്റിന്റെ ചിത്രവുമായി നടി സുബി സുരേഷ്. ബസില്‍ ആരും തിരിച്ചറിയാതെയുള്ള യാത്രക്കിടയില്‍ കണ്ടക്റ്റര്‍ എടുത്ത ചിത്രമാണിത്. എറണാകുളത്ത് നിന്ന് വെഞ്ഞാറമൂട്ടിലേക്കാണ് പണ്ഡിറ്റ് യാത്ര തിരിച്ചത്. മാസ്‌ക് ധരിച്ച താരത്തെ ആര്‍ക്കും പെട്ടെന്ന് മനസിലാവില്ല.
”ചില വ്യക്തിത്വങ്ങള്‍ ഇപ്രകാരം ആണ്. ആരവങ്ങള്‍ ഇല്ലാതെ, നമ്മളുടെ സ്വന്തം ആനവണ്ടിയില്‍. ആരാണെന്ന് പറയാമോ?” എന്ന ക്യാപ്ഷനോടെയാണ് സുബി സുരേഷ് സന്തോഷ് പണ്ഡിറ്റിന്റെ ചിത്രം പങ്കുവച്ചിരിക്കുന്നത്. പാവപ്പെട്ടവരുടെ യഥാര്‍ത്ഥ നന്മമരം ഇദ്ദേഹമാണ് എന്നിങ്ങനെയുള്ള കമന്റുകളാണ് ചിത്രത്തിന് ലഭിക്കുന്നത്.
ആലപ്പുഴ സ്വദേശിയായ കണ്ടക്ടര്‍ ഷഫീഖ് ഇബ്രാഹിമാണ് സന്തോഷ് പണ്ഡിറ്റിന്റെ ചിത്രം പകര്‍ത്തിയത്. ടിക്കറ്റെടുക്കാന്‍ പണം നല്‍കവെയാണ് കണ്ടക്ടര്‍ താരത്തെ തിരിച്ചറിഞ്ഞത്. തുടര്‍ന്ന് ഫോട്ടോ എടുത്ത് ‘ഈ യാത്രക്കാരനെ തിരിച്ചറിയാമോ’ എന്ന ക്യാപ്ക്ഷനോടെ കെഎസ്ആര്‍ടിസി വാട്ട്സ്ആപ്പ് ഗ്രൂപ്പിലും ഫെയ്‌സ്ബുക്ക് പേജിലും പങ്കുവയ്ക്കുകയായിരുന്നു.
ഇ-ബുള്‍ ജെറ്റ് വ്‌ളോഗര്‍മാരുടെ പ്രശ്‌നത്തിന്റെ പശ്ചാത്തലത്തില്‍ സാമൂഹ്യ സേവനവും ലാളിത്യവും പരാമര്‍ശിച്ചാണ് സന്തോഷ് പണ്ഡിറ്റിന്റെ ചിത്രം സോഷ്യല്‍ മീഡിയയില്‍ ശ്രദ്ധ നേടുന്നത്.
