ജയസൂര്യ നായകനാകുന്ന “തൃശൂര്‍ പൂര”ത്തിലെ ഗാനം ഏറ്റെടുത്ത് സോഷ്യല്‍ മീഡിയ. നടി ഗായത്രി അരുണ്‍ അടക്കം നിരവധി പേരാണ് “സഖിയേ” എന്ന ഗാനം ആലപിച്ചെത്തിയിരിക്കുന്നത്. ബുധനാഴ്ച എത്തിയ ഗാനം പന്ത്രണ്ട് ലക്ഷത്തിലധികം വ്യൂസുമായി യൂട്യൂബ് ട്രെന്‍ഡിങ് ലിസ്റ്റില്‍ ഒന്നാമതായി തുടരുകയാണ്.
ബികെ ഹരിനാരായണന്റെ വരികള്‍ക്ക് ഈണം പകര്‍ന്നിരിക്കുന്നത് രതീഷ് വേഗയാണ്. ആലാപനം ഹരിചരണ്‍. രാജേഷ് മോഹന്‍ സംവിധാനം ചെയ്യുന്ന ചിത്രം തൃശൂരിന്റെ ജീവിതവുമായി ബന്ധപ്പെട്ട, തൃശൂര്‍ പൂരത്തിന്റെ എല്ലാ ഭാവങ്ങളും പറയുന്ന ഒരു സിനിമയാവും എന്നാണ് അണിയറ പ്രവര്‍ത്തകര്‍ അവകാശപ്പെടുന്നത്.
ജയസൂര്യക്കൊപ്പം തനി തൃശൂര്‍ ഭാഷ പറഞ്ഞ് നടി സ്വാതി റെഡ്ഡിയും എത്തുന്നുണ്ട്. സംഗീത സംവിധായകന്‍ രതീഷ് വേഗയാണ് ചിത്രത്തിന്റെ തിരക്കഥയും സംഭാഷണവും ഒരുക്കിയിരിക്കുന്നത്. രതീഷ് വേഗ ആദ്യമായി തിരക്കഥയും സംഭാഷണവും ഒരുക്കുന്ന ചിത്രമാണ് തൃശൂര്‍ പൂരം.
