സംവിധായകനായി നിരവധി മികച്ച സിനിമകള്‍ മലയാളി പ്രേക്ഷകര്‍ക്ക് സമ്മാനിച്ച റോഷന്‍ ആന്‍ഡ്രൂസ് അഭിനയരംഗത്തേക്കും എത്തിയിരിക്കുകയാണ്. മലയാളത്തിന്റെ ലേഡി സൂപ്പര്‍ സ്റ്റാര്‍ മഞ്ജു വാര്യരെ നായികയാക്കി ഒരുക്കുന്ന “പ്രതി പൂവന്‍കോഴി” യില്‍ സംവിധായകന്‍ മാത്രമല്ല വില്ലന്റെ റോളിലും കൂടി എത്തുകയാണ് റോഷന്‍ ആന്‍ഡ്രൂസ്.
മഞ്ജു നോക്കുന്ന ഒരു കണ്ണാടിയില്‍ തെളിഞ്ഞ് വന്ന ആന്റപ്പന്‍ എന്ന വില്ലന്‍, പ്രതി പൂവന്‍കോഴിയില്‍ റോഷന്‍ ആന്‍ഡ്രൂസ് അവതരിപ്പിക്കുന്ന കഥാപാത്രത്തിന്റെ ലുക്ക് സോഷ്യല്‍ മീഡിയയില്‍ വൈറലായിരുന്നു. ശക്തമായ പ്രതിനായക വേഷത്തില്‍ ഞെട്ടിക്കാന്‍ തന്നെ ഒരുങ്ങുകയാണ് റോഷന്‍ ആന്‍ഡ്രൂസ്. അഭിനയത്തോട് ഇഷ്ടമുണ്ടെങ്കിലും അഭിനയിപ്പിക്കുന്ന സംവിധായകനാകാണ് തനിക്കിഷ്ടം എന്ന് പറയുന്ന സംവിധായകന്‍ വില്ലന്‍ വേഷത്തില്‍ അഭിനയിക്കാന്‍ ഒരുങ്ങിയതും യാദൃശ്ചികമായാണ്.
“ആന്റപ്പന്‍” എന്ന വില്ലന്‍ വേഷം ചെയ്യാനായി പ്രമുഖ നടന്‍മാര്‍ ചോദിച്ച തുക താങ്ങാന്‍ വയ്യാത്തതുകൊണ്ടാണ് താന്‍ തന്നെ ആ വേഷം ഏറ്റെടുത്തതെന്ന് റോഷന്‍ ആന്‍ഡ്രൂസ് വ്യക്തമാക്കിയിരുന്നു.
“ആക്ഷന്‍ ഹീറോ ബിജു”വില്‍ ഒരു വേഷം ചെയ്യാന്‍ നിവിന്‍ ഒരുപാട് നിര്‍ബന്ധിച്ചിരുന്നെങ്കിലും അന്ന് അത് ചെയ്യാന്‍ കഴിഞ്ഞില്ല. പ്രതി പൂവന്‍കോഴിയുടെ തിരക്കഥാകൃത്തായ ഉണ്ണി ആര്‍ ആണ് ഈ കഥാപാത്രം ചെയ്യാനായി തന്നോട് ആവശ്യപ്പെട്ടത്. വീട്ടിലും എല്ലാവരും പൂര്‍ണ പിന്തുണ നല്‍കി. തിരക്കഥാകൃത്ത് സഞ്ജയ്യും തന്നെ പ്രോത്സാഹിപ്പിച്ചു എന്ന് റോഷന്‍ ആന്‍ഡ്രൂസ് തുറന്നു പറഞ്ഞിരുന്നു.
Read more
മാധുരി എന്ന സെയില്‍സ് ഗേള്‍ ആയാണ് മഞ്ജു ചിത്രത്തില്‍ വേഷമിടുന്നത്. കലിപ്പ് ലുക്കിലെത്തിയ മഞ്ജുവിന്റെ ഫസ്റ്റ്‌ലുക്ക് പോസ്റ്ററും ട്രെയിലറും ആരാധകര്‍ ഏറ്റെടുത്തിരുന്നു. മാധുരിയുടെ ജീവിതത്തിലെ അപ്രതീക്ഷിത സംഭവങ്ങളിലൂടെയാണ് ചിത്രം മുന്നോട്ട് പോകുന്നത്. “ഹൗ ഓള്‍ഡ് ആര്‍ യു” വിന് ശേഷം റോഷന്‍ ആന്‍ഡ്രൂസ്-മഞ്ജു വാര്യര്‍ കൂട്ടുകെട്ടില്‍ ഒരുങ്ങുന്ന ചിത്രമാണിത്. ശ്രീ ഗോകുലം മൂവീസിന്റെ ബാനറില്‍ ഗോകുലം ഗോപാലന്‍ ആണ് ചിത്രം നിര്‍മ്മിക്കുന്നത്. ഡിസംബര്‍ 20- ന് ചിത്രം റിലീസിനെത്തും.
