മമ്മൂട്ടിയെ നായകനാക്കി രമേശ് പിഷാരടി ഒരുക്കുന്ന പുതിയ ചിത്രമാണ് ഗാനഗന്ധര്‍വ്വന്‍. ചിത്രത്തിലെ താരങ്ങളെ പരിചയപ്പെടുത്തുന്ന കാരക്ടര്‍ പോസ്റ്ററുകള്‍ പങ്കുവെച്ച രമേഷ് പിഷാരടി ഒരു നടിയുടെ പഴയ സിനിമ ഓര്‍മ്മപ്പെടുത്തിയിരിക്കുകയാണ്. അനശ്വര നടന്‍ ജഗന്നാഥ വര്‍മ്മയുടെ മരുമകള്‍ കൂടിയായ നടി സിന്ധു മനു വര്‍മ്മയെ പരിചയപ്പെടുത്തിയാണ് പിഷാരടിയുടെ പോസ്റ്റ്.
തലയിണമന്ത്രം എന്ന സൂപ്പര്‍ഹിറ്റ് ചിത്രത്തില്‍ കരാട്ടെക്കാരനായ ഇന്നസന്റിന്റെയും മീനയുടെയും മകളായി അഭിനയിച്ച സിന്ധു ഇപ്പോള്‍ ഗാനഗന്ധര്‍വനില്‍ പ്രിന്‍സിപ്പലിന്റെ വേഷത്തിലാണ് എത്തുന്നത്. നടന്‍ മനു വര്‍മ്മയുടെ ഭാര്യയാണ് സിന്ധു.
“സിന്ധു മനു വര്‍മ്മ, ലൊക്കേഷനില്‍ എത്തിയപ്പോള്‍ ആളെ നല്ല പരിചയം. “തലയിണമന്ത്രം” എന്ന ചിത്രത്തില്‍ കരാട്ടെക്കാരനായ ഇന്നസെന്റ് ചേട്ടന്റെയും മീന ചേച്ചിയുടെയും മകള്‍ ( ജാക്കിചാന്റെ ആരാധിക) ആയി അഭിനയിച്ച അതേ ആള്‍. അന്ന് ഇംഗ്ലീഷ് മീഡിയം വിദ്യാര്‍ത്ഥിനി ആയിരുന്നു, ഇന്ന് പ്രിന്‍സിപ്പല്‍. മലയാള സിനിമയ്ക്ക് സുപരിചിതനായ അനശ്വര നടന്‍ ജഗന്നാഥ വര്‍മ്മയുടെ മരുമകള്‍ ആണ് സിന്ധു മനു വര്‍മ്മ.” ക്യാരക്ടര്‍ പോസ്റ്റര്‍ പങ്കുവെച്ച് പിഷാരടി ഫെയ്‌സ്ബുക്കില്‍ കുറിച്ചു.
Read more
മുകേഷ്, ഇന്നസെന്റ്, സിദ്ധിഖ്, സലിം കുമാര്‍, ധര്‍മ്മജന്‍ ബോള്‍ഗാട്ടി, ഹരീഷ് കണാരന്‍, മനോജ് കെ ജയന്‍, സുരേഷ് കൃഷ്ണ, മണിയന്‍ പിള്ള രാജു, കുഞ്ചന്‍, അശോകന്‍, സുനില്‍ സുഖദ, അതുല്യ, ശാന്തി പ്രിയ തുടങ്ങി വന്‍താരനിരയാണ് ചിത്രത്തിലുള്ളത്. രമേഷ് പിഷാരടിയും ഹരി പി നായരും ചേര്‍ന്നാണ് ചിത്രത്തിന്റെ കഥയും തിരക്കഥയും സംഭാഷണവും ഒരുക്കിയിരിക്കുന്നത്. ശ്രീലക്ഷ്മി ആര്‍, ശങ്കര്‍ രാജ് ആര്‍, രമേഷ് പിഷാരടി എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. അഴകപ്പന്‍ ഛായാഗ്രഹണം നിര്‍വഹിക്കുന്ന ചിത്രത്തിന് സംഗീതമൊരുക്കുന്നത് ദീപക് ദേവാണ്.
