മറ്റൊന്നുമല്ല, ഇന്ത്യന് സിനിമയുടെ ചരിത്രത്തില്ത്തന്നെ റെക്കോര്ഡ് കളക്ഷനുമായി മുന്നേറുന്ന പുഷ്പ 2 പ്രദര്ശിപ്പിച്ച കൊച്ചിയിലെ തിയറ്ററിൽ സിനിമയുടെ രണ്ടാം പകുതി ആദ്യം പ്ലേ ചെയ്തതായി റിപ്പോർട്ട്. കൊച്ചി സെന്റര് സ്ക്വയര് മാളിലെ സിനിപൊളിസ് മള്ട്ടിപ്ലെക്സിലെ ഒരു സ്ക്രീനില് വെള്ളിയാഴ്ച വൈകിട്ട് 6.30 ന്റെ ഷോയ്ക്കാണ് അബദ്ധം പറ്റിയത്.
സീക്വല് ചിത്രം ആയതിനാലും ചിത്രം രണ്ടാം വട്ടം കാണുന്ന പ്രേക്ഷകര് ഷോയ്ക്ക് ഇല്ലാതിരുന്നതിനാലും തിയറ്ററുകാരുടെ അബദ്ധം കാണികള്ക്ക് പെട്ടെന്ന് തിരിച്ചറിയാനായില്ല. ഇടവേളയ്ക്ക് തൊട്ടുമുന്പ് എന്ഡ് ക്രെഡിറ്റ്സ് എഴുതിക്കാണിച്ചപ്പോഴാണ് തങ്ങള് ഇതുവരെ കണ്ടത് ചിത്രത്തിന്റെ രണ്ടാം പകുതിയാണെന്ന് കാണികള് തിരിച്ചറിഞ്ഞത്. തുടർന്ന് തങ്ങള്ക്ക് പണം തിരിച്ച് നല്കണമെന്ന് ഒരു വിഭാഗം കാണികൾ ആവശ്യപ്പെട്ടു.
എന്നാൽ ആദ്യ പകുതി കാണിക്കണമെന്നായിരുന്നു കാണികളില് ഒരു വിഭാഗത്തിന്റെ ആവശ്യം. രാത്രി 9 മണിയോടെയാണ് ഇതേ ഷോയില് ചിത്രത്തിന്റെ ആദ്യ പകുതി തിയറ്ററുകാര് പ്രദർശിപ്പിച്ചത്. എന്നാല് ടിക്കറ്റ് എടുത്തവരില് വലിയൊരു വിഭാഗം അത് കാണാന് നില്ക്കാതെ മടങ്ങിയിരുന്നു. അതേസമയം ഷോയ്ക്ക് എത്തിയവര്ക്ക് പണം തിരികെ നല്കുമെന്നാണ് സിനിപൊളിസ് അറിയിച്ചിരിക്കുന്നത്.
