ആരാധകര്‍ വളരെ പ്രതീക്ഷയോടെ കാത്തിരിയ്ക്കുന്ന മോഹന്‍ലാല്‍ ചിത്രമാണ് ഒടിയന്‍. വി എ ശ്രീകുമാറിന്റെ സംവിധാനത്തില്‍ ഒരുങ്ങുന്ന ഈ ചിത്രം വളരെ വൈകിയാണ് ഷൂട്ടിങ് ആരംഭിച്ചത്. സിനിമയുടെ അവസാന ഷെഡ്യൂള്‍ ഇനിയും പൂര്‍ത്തിയാകാനുമുണ്ട്. മുന്‍പ് പറഞ്ഞ തീയതികളിലൊന്നും ഷൂട്ടിങ് പൂര്‍ത്തീകരിക്കാന്‍ സാധിക്കാതിരുന്നതിനു പിന്നില്‍ നടന്‍ പ്രകാശ് രാജാണെന്ന് റിപ്പോര്‍ട്ടുകള്‍ സൂചിപ്പിക്കുന്നു.
ഒടിയനില്‍ വളരെ പ്രധാനപ്പെട്ട ഒരു കഥാപാത്രത്തെയാണ് പ്രകാശ് രാജ് അവതരിപ്പിക്കുന്നത്. എന്നാല്‍ പ്രകാശിനു ഡേറ്റില്ലാത്തതാണ് ഷൂട്ടിങ് വൈകാന്‍ കാരണമായതെന്നാണ് റിപ്പോര്‍ട്ടുകള്‍ പറയുന്നത്. ഒടിയന്റെ ചിത്രീകരണം മൂന്നു ഷെഡ്യൂളുകളിലായി പൂര്‍ത്തിയാക്കാനായിരുന്നു സംവിധായകന്‍ തീരുമാനിച്ചിരുന്നത്. ആദ്യ രണ്ടു ഭാഗം ഭംഗിയായി പൂര്‍ത്തീകരിച്ചെങ്കിലും ജനുവരിയില്‍ ആരംഭിക്കുമെന്ന് കരുതിയിരുന്ന അവസാന ഭാഗം നീട്ടി വയ്‌ക്കേണ്ടി വരികയായിരുന്നു. ഈ ഷെഡ്യൂളിലുള്ളത് പ്രകാശ് രാജിന്റെ സീനുകളാണെന്നാണ് സൂചന.
Read more
പ്രകാശ് രാജിനു പുറമേ മോഹന്‍ലാലും നിലവില്‍ ഷൂട്ടിങ് തിരക്കുകളിലാണ്. ഒടിയന്റെ ഷൂട്ടിങ് താല്‍ക്കാലികമായി നിര്‍ത്തിയതോടെ അജോയ് വര്‍മ്മ സംവിധാനം ചെയ്യുന്ന നീരാളി എന്ന സിനിമയില്‍ അഭിനയിക്കുകയാണ് മോഹന്‍ലാല്‍. ഒടിയന്‍ മാണിക്യനായി മോഹന്‍ലാല്‍ അഭിനയിക്കുമ്പോള്‍ രാവൂണ്ണി എന്ന കഥാപാത്രത്തെയാണ് പ്രകാശ് രാജ് അവതരിപ്പിക്കുന്നത്. സിനിമയുടെ അവസാന ഷെഡ്യൂള്‍ ഫെബ്രുവരിയില്‍ ആരംഭിക്കുമെന്ന വാര്‍ത്തകളും പ്രചരിക്കുന്നുണ്ട്. മോഹന്‍ലാല്‍, മഞ്ജു വാര്യര്‍, പ്രകാശ് രാജ് എന്നിവര്‍ക്ക് പുറമെ സിദ്ദിഖ്, ഇന്നസെന്റ്, നരേന്‍, കൈലാഷ്, സന അല്‍താഫ്, അപ്പാനി ശരത്, നന്ദു എന്നിവരാണ് സിനിമയിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
