‘ഈശോ’ എന്ന പേരിലുള്ള സിനിമ റിലീസ് ചെയ്യാന് അനുവദിക്കില്ലെന്ന് പി.സി ജോര്ജ്. ഈ സിനിമ ഒരു തിയേറ്ററിലും പ്രദര്ശിപ്പിക്കാന് അനുവദിക്കുകയില്ല. ഇതിന് വേണ്ടി കേരളം മുഴുവന് ഇറങ്ങും എന്ന് ഒരു ഓണ്ലൈന് മാധ്യമത്തിന് നല്കിയ അഭിമുഖത്തില് പി.സി ജോര്ജ് പറഞ്ഞു. ജയസൂര്യയെ നായകനാക്കി നാദിര്ഷ ഒരുക്കുന്ന ചിത്രത്തിന്റെ പേരിനെതിരെ വിമര്ശനങ്ങള് ഉയരുന്ന സാഹചര്യത്തിലാണ് പി.സിയുടെ പ്രതികരണം.
നാദിര്ഷായെയും കൂട്ടരെയും താന് വിടില്ല. ക്രിസ്ത്യന് സമൂഹത്തെ മാത്രമല്ല, അതിപ്പോള് മുസ്ലിം സമൂഹത്തെയും ഹൈന്ദവ സമൂഹത്തെയും അപമാനിച്ചാലും വിടില്ല. എംഎല്എ അല്ലാത്തതിനാല് ധാരാളം സമയം കിട്ടുന്നുണ്ട്. ഇവനെയൊക്കെ നന്നാക്കിയിട്ടേ താന് പോകൂ. നാദിര്ഷയെ പോലൊരാള് ഇങ്ങനെ ചെയ്തല്ലോ എന്ന് ഓര്ക്കുമ്പോഴാണ് വിഷമം.
ഈ പേരില് സിനിമ ഇറക്കാമെന്ന് വിചാരിക്കേണ്ട. അങ്ങനെയെങ്കില് ഒരു തിയേറ്ററിലും ഈ ചിത്രം പ്രദര്ശിപ്പിക്കുകയുമില്ല. കേരളം മുഴുവന് ഇതിനായി ഇറങ്ങും. ക്രിസ്ത്യന് സമൂഹത്തെ അപമാനിക്കണമെന്ന നിര്ബന്ധബുദ്ധിയോടെ ഇറങ്ങിത്തിരിച്ച കുറച്ച് സിനിമാക്കാര് ഉണ്ട്. ഇപ്പോള് മലയാള സിനിമയിലെ ഗുണ്ടാകഥാപാത്രങ്ങള് എടുത്തുനോക്കുക. മിക്ക ഗുണ്ടകളും ക്രിസ്ത്യാനികള് ആയിരിക്കും, അവന്റെ കഴുത്തില് ഒരു കുരിശും കാണും.
Read more
ഇത് ഇന്നും ഇന്നലെയും തുടങ്ങിയ കാര്യമല്ല. പരാതികള് കുറച്ച് നാളുകളുമായി തനിക്ക് കിട്ടുന്നുണ്ടായിരുന്നു. കേരളത്തില് ഏറ്റവും വലിയ സാംസ്കാരിക മൂല്യങ്ങള്ക്ക് വില കല്പിച്ച സഭയാണ് ക്രൈസ്തവ സഭ. സമൂഹത്തിനു വേണ്ടി ചെയ്യാന് കഴിയുന്ന എല്ലാ നന്മകളും ഇവര് ചെയ്തു. ഇത് വൃത്തികെട്ട അനീതിയാണ്. ചോദിക്കാനും പറയാനും ആരുമില്ല എന്ന തോന്നലാണ് ഇത്തരക്കാര്ക്ക് വളം എന്നും പി.സി പറഞ്ഞു.