മോഹന്ലാലിന്റെയും ഭാര്യ സുചിത്രയുടെയുടെയും 31-ാം വിവാഹവാര്ഷികമാണ് ഇന്ന്. 1988 ഏപ്രില് 28ന് തിരുവനന്തപുരത്തെ ആറ്റുകാല് ഭഗവതി ക്ഷേത്രത്തില് വെച്ചായിരുന്നു ഇവരുടെ വിവാഹം. 31ാം വിവാഹ വാര്ഷികം ആഘോഷിക്കുന്ന മോഹന്ലാലിനും സുചിത്രയ്ക്കും ആശംസ നേര്ന്ന് ആരാധകലോകവും എത്തിയിട്ടുണ്ട്. സോഷ്യല് മീഡിയയിലൂടെ നിമിഷനേരം കൊണ്ടാണ് പല പോസ്റ്റുകളും വൈറലായി മാറുന്നത്.
പ്രശസ്ത തമിഴ് നടനും നിര്മ്മാതാവായ കെ. ബാലാജിയുടെ മകളും സുരേഷ് ബാലാജിയുടെ സഹോദരിയുമാണ് സുചിത്ര. ജാതകം ചേരില്ലെന്ന കാരണത്താല് ആദ്യം വേണ്ടെന്നു വച്ച കല്യാണാലോചന രണ്ടു വര്ഷങ്ങള്ക്കു ശേഷം വീണ്ടും നിയോഗം പോലെ വീട്ടുകാര് നടത്തികൊടുക്കുകയായിരുന്നു.
സിനിമയില് നേട്ടങ്ങള് ഒന്നൊന്നായി പിന്നിടുമ്പോഴും മോഹന്ലാല് തന്നേയും കൃത്യമായി ചേര്ത്തുപിടിച്ചിരുന്നുവെന്ന് സുചിത്ര പറയുന്നു. സിനിമാതിരക്കുകള്ക്കിടയില് കുടുംബത്തിലെ കാര്യങ്ങളും ബിസിനസ്സുമൊന്നും ശ്രദ്ധിക്കാന് താരത്തിന് കഴിയുമായിരുന്നില്ല, യാതൊരുവിധ പരാതികളുമില്ലാതെ സുചിത്രയായിരുന്നു എല്ലാം ചെയ്തിരുന്നത്.
നാല് പതിറ്റാണ്ട് നീണ്ടുനില്ക്കുന്ന സിനിമാജീവിതത്തിനിടയില് സ്വന്തമായൊരു സിനിമയെന്ന പ്രഖ്യാപനം മോഹന്ലാല് നടത്തിയത് അടുത്തിടെയായിരുന്നു. ബ്ലോഗിലൂടെയാണ് അദ്ദേഹം ഇക്കാര്യത്തെക്കുറിച്ച് വ്യക്തമാക്കിയത്. സംവിധാനമെന്നത് വലിയ പണിയാണെന്നും അഭിനേതാവായി മുന്നേറുന്നതിനിടയില് അത് സാധിക്കുമോയെന്നറിയില്ലെന്ന തരത്തിലുള്ള മറുപടികളായിരുന്നു അദ്ദേഹം നേരത്തെ നല്കിയത്.