ദളപതിക്ക് പിറന്നാള്‍ സമ്മാനം; വിജയ് – ആറ്റ്‌ലി – നയന്‍താര ചിത്രം ‘ബിഗില്‍’

തെറി, മെര്‍സല്‍ തുടങ്ങിയ വിജയ ചിത്രങ്ങള്‍ക്ക് ശേഷം അറ്റ്‌ലി- വിജയ് ടീം ഒന്നിക്കുന്ന ചിത്രത്തിന്റെ ഫസ്റ്റ് ലുക്ക് റിലീസ് ചെയ്തു. വിജയ്ക്ക് പിറന്നാള്‍ സമ്മാനമായാണ് അറ്റ്‌ലി പോസ്റ്റര്‍ പുറത്തു വിട്ടത്. ബിഗില്‍ എന്ന് പേരിട്ടിരിക്കുന്ന വിജയ് രണ്ട് വ്യത്യസ്ത ഗെറ്റപ്പിലെത്തുമെന്നാണ് പോസ്റ്ററില്‍ നിന്ന് മനസ്സിലാകുന്നത്.

ജെഴ്‌സി അണിഞ്ഞ് ഫുട്‌ബോളുമായി നില്‍ക്കുന്ന ഒരു ലുക്കിലും, മുണ്ടും ഷര്‍ട്ടും ധരിച്ച് നരകയറിയ മറ്റൊരു ലുക്കിലുമാണ് വിജയ് പോസ്റ്ററില്‍. നയന്‍താര നായികയായെത്തുന്ന സ്‌പോര്‍ട്‌സ് പശ്ചാത്തലമായുള്ള ചിത്രത്തില്‍ ഫുട്‌ബോള്‍ കോച്ചായാണ് വിജയ് എത്തുന്നതെന്ന് നേരത്തെ റിപ്പോര്‍ട്ടുകള്‍ ഉണ്ടായിരുന്നു.

എജിഎസ് എന്റര്‍ടെയ്ന്‍മെന്റ് നിര്‍മ്മിക്കുന്ന ചിത്രം ദളപതി 63 എന്ന പേരിലാണ് ഇതുവരെ അറിയപ്പെട്ടിരുന്നത്. വിജയിന്റെ 63-ാമത് ചിത്രമാണ് ഇത്.
ചിത്രത്തില്‍ വിവേക്, പരിയേറും പെരുമാള്‍ ഫെയിം കതിര്‍, യോഗി ബാബു, റോബോ ശങ്കര്‍ എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. എ.ആര്‍ റഹമാനാണ് ചിത്രത്തിന് സംഗീതം ഒരുക്കുന്നത്. കെ.ജി വിഷ്ണുവാണ് ഛായാഗ്രഹണം. നിര്‍മ്മാണം എ.ജി.എസ് എന്റര്‍ടെയ്‌മെന്റ്. ദീപാവലിക്ക് ചിത്രം തിയേറ്ററുകളിലെത്തുക.