'ബിജു മേനോന്‍ ഞെട്ടിച്ചു ആ ശബ്ദം പോലും മനസ്സിലായില്ല'; ചര്‍ച്ചയായി 'ആര്‍ക്കറിയാം' ടീസര്‍

ബിജു മേനോന്‍, പാര്‍വതി തിരുവോത്ത്, ഷറഫുദ്ദീന്‍ എന്നിവര്‍ കേന്ദ്ര കഥാപാത്രങ്ങളകുന്ന “ആര്‍ക്കറിയാം” ചിത്രത്തിന്റെ ടീസര്‍ സോഷ്യല്‍ മീഡിയയില്‍ ചര്‍ച്ചയാകുന്നു. ഛായാഗ്രാഹകനായ സാനു ജോണ്‍ വര്‍ഗീസ് സംവിധാനം ചെയ്യുന്ന ചിത്രത്തില്‍ വയോധികന്റെ വേഷത്തിലാണ് ബിജു മേനോന്‍ എത്തുന്നത്.

ബിജു മേനോന്റെ ലുക്കും ഗെറ്റപ്പുമാണ് സോഷ്യല്‍ മീഡിയ ഏറ്റെടുത്തിരിക്കുന്നത്. “”ബിജു മേനോന്‍ ഞെട്ടിച്ചു ആ ശബ്ദം പോലും മനസ്സിലായില്ല. ടൈറ്റിലില്‍ പുള്ളിയുടെ പേര് കൊടുത്തത് നന്നായി”” എന്നിങ്ങനെയുള്ള പ്രതികരണങ്ങളാണ് ടീസറിന് ലഭിക്കുന്നത്. കോട്ടയം ഭാഷ സംസാരിക്കുന്ന പാര്‍വതിയെയും ഷറഫുദ്ദീനെയും ടീസറില്‍ കാണാം.

ലോക്ഡൗണിന് തൊട്ടു മുമ്പ് മുംബൈയില്‍ നിന്നും കേരളത്തിലേക്ക് പോകുന്ന ദമ്പതികളെ കുറിച്ചും തുടര്‍ന്ന് നടക്കുന്ന സംഭവങ്ങളെ കുറിച്ചുമാണ് ചിത്രം. പാലാക്കാരനായാണ് ബിജു മേനോന്‍ വേഷമിടുന്നത് എന്നാണ് സാനു ജോണ്‍ വര്‍ഗീസ് ടൈംസ് ഓഫ് ഇന്ത്യയോട് പറഞ്ഞത്. സൈജു കുറുപ്പ്, ആര്യ സലിം തുടങ്ങിയവരും ചിത്രത്തില്‍ പ്രധാന വേഷങ്ങളിലെത്തും.

മൂണ്‍ഷോട്ട് എന്റര്‍ടെയിന്‍മെന്റും ഒപിഎം ഡ്രീംമില്‍ സിനിമാസിന്റെയും ബാനറില്‍ സന്തോഷ് ടി കുരുവിളയും ആഷിഖ് അബുവും ചേര്‍ന്നാണ് ചിത്രം നിര്‍മിക്കുന്നത്. ചിത്രത്തിന്റെ തിരക്കഥ നിര്‍വഹിച്ചിരിക്കുന്നത് ജോണ്‍ വര്‍ഗീസും രാജേഷ് രവിയും അരുണ്‍ ജനാര്‍ദ്ദനനും ആണ്. ഫെബ്രുവരി 26-ന് ചിത്രം തിയേറ്ററില്‍ റിലീസ് ചെയ്യും.