ജയസൂര്യയുടെ ത്രില്ലര്‍ ചിത്രം അന്വേഷണത്തിനായുള്ള ആകാംക്ഷാഭരിതമായുള്ള കാത്തിരിപ്പിലാണ് ആരാധകര്‍. തിയേറ്ററില്‍ നടന്‍ അത്ഭുതപ്പെടുത്തുമെന്ന് തന്നെയാണ് തങ്ങളുടെ പൂര്‍ണ്ണവിശ്വാസമെന്ന് ട്രെയിലര്‍ കണ്ട പ്രേക്ഷകര്‍ പറയുന്നു. മികച്ച വരവേല്‍പ്പാണ് ചിത്രത്തിന്റെ പോസ്റ്ററുകള്‍ക്കും ട്രെയിലറിനും ലഭിച്ചത്.
പ്രേതത്തിന് ശേഷം ജയസൂര്യയും ശ്രുതി രാമചന്ദ്രനും ഒന്നിച്ചെത്തുന്നു എന്ന പ്രത്യേകതയും അന്വേഷണത്തിനുണ്ട്. ലില്ലി എന്ന ചിത്രം സംവിധാനം ചെയ്ത പ്രശോഭിന്റെ രണ്ടാമത്തെ ചിത്രമാണ് അന്വേഷണം.
“സത്യം എപ്പോഴും വിചിത്രമായിരിക്കും” എന്ന ടാഗ് ലൈനോടുകൂടെ എത്തുന്ന ചിത്രം ഒരു മെഡിക്കല്‍ ത്രില്ലര്‍ ആണെന്ന സൂചനയാണ് ട്രെയിലര്‍ നല്‍കുന്നത്. “ലില്ലി”ക്ക് ശേഷം പ്രശോഭ് വിജയന്‍ സംവിധാനം ചെയ്യുന്ന ചിത്രത്തിന്റെ കഥ നവാഗതനായ ഫ്രാന്‍സിസ് തോമസിന്റേതാണ്. ലാല്‍, വിജയ് ബാബു, ലിയോണ ലിഷോയ്, ലെന തുടങ്ങിയവര്‍ പ്രധാനകഥാപാത്രങ്ങളായി എത്തുന്നു.
Read more
സുജിത് വാസുദേവാണ് ഛായാഗ്രഹണം. ഇ4 എന്റര്‍ടൈന്‍മെന്റ്‌സിന്റെ ബാനറില്‍ മുകേഷ് ആര്‍.മെഹ്ത, എ.വി അനൂപ്, സി.വി സാരഥി എന്നിവരാണ് ചിത്രം നിര്‍മ്മിക്കുന്നത്. ജേക്സ് ബിജോയ് സംഗീതം നിര്‍വഹിക്കുന്ന ചിത്രം ഈ മാസം 31 ന് തിയേറ്ററുകളിലെത്തും.
