സൂപ്പര്‍സ്റ്റാര്‍ ചിത്രങ്ങള്‍ക്ക് പോലും ഇത് അവകാശപ്പെടാന്‍ പറ്റില്ല, ആദിക്ക് റെക്കോര്‍ഡ് സാറ്റലൈറ്റ് തുക

സൂപ്പര്‍സ്റ്റാര്‍ ചിത്രങ്ങളെ പോലും കടത്തിവെട്ടുന്ന സാറ്റലൈറ്റ് തുകയുമായി പ്രണവ് മോഹന്‍ലാല്‍ ചിത്രം ആദി. ആറു കോടി രൂപയ്ക്കാണ് ചിത്രത്തിന്റെ സാറ്റലൈറ്റ് റൈറ്റ്‌സ് ടെലിവിഷന്‍ ചാനല്‍ സ്വന്തമാക്കിയിരിക്കുന്നത്. മോഹന്‍ലാലിന്റെ ലാല്‍സലാം ഉള്‍പ്പെടെയുള്ള പരിപാടികള്‍ എയര്‍ ചെയ്യുന്ന അമൃതാ ടിവിയാണ് ആദിയുടെ സാറ്റലൈറ്റ് റൈറ്റ്‌സ് എടുത്തിരിക്കുന്നതെന്നാണ് വിവരം.

പ്രണവ് മോഹന്‍ലാലിന്റെ ആദ്യ ചിത്രത്തിന് ഇത്ര ഉയര്‍ന്ന സാറ്റലൈറ്റ് തുക ലഭിക്കുമ്പോള്‍ അത് ചിത്രത്തെക്കുറിച്ചുള്ള പ്രതീക്ഷ അത്ര ഉയരത്തിലാണെന്നുള്ള സൂചനയാണ് നല്‍കുന്നത്. ജീത്തു ജോസഫ് തിരക്കഥ എഴുതി സംവിധാനം ചെയ്യുന്ന ചിത്രമെന്നതും ആദിയെക്കുറിച്ചുള്ള പ്രതീക്ഷകള്‍ വര്‍ദ്ധിപ്പിക്കുന്നുണ്ട്.

ആദിയുടെ ഫസ്റ്റ് ലുക്ക് പോസ്റ്റര്‍ ഫസ്റ്റ്‌ലുക്ക് ടീസര്‍ എന്നിവ സോഷ്യല്‍ മീഡിയയില്‍ വലിയ തരംഗമുണ്ടാക്കിയിരുന്നു. അതിന് പിന്നാലെയാണ് സാറ്റലൈറ്റ് റൈറ്റ്‌സ് സംബന്ധിച്ച വാര്‍ത്തകള്‍ പുറത്തു വരുന്നത്.

മമ്മൂട്ടിയുടെ മകന്‍ ദുല്‍ഖര്‍ സല്‍മാന്‍ മലയാള സിനിമയുടെ നട്ടെല്ലായി മാറിയത് പോലെ പ്രണവ് മോഹന്‍ലാലും വളര്‍ന്നുവരുമെന്നാണ് ആരാധകവൃന്ദം പ്രതീക്ഷിക്കുന്നത്. മോഹന്‍ലാല്‍ ചിത്രം നരസിംഹം റിലീസ് ചെയ്ത ജനുവരി 26നാണ് ആദി റിലീസ് ചെയ്യുന്നത്.