നടനില്‍ നിന്ന് നിര്‍മ്മാതാവിലേക്ക് അവിടെ നിന്ന് പ്രഗത്ഭനായ സംവിധായകനിലേക്ക് ചുവടുവെച്ച് തൊട്ടതെല്ലാം വിജയമാക്കി മുന്നേറുകയാണ് പൃഥ്വിരാജ് സുകുമാരന്‍. മോഹന്‍ലാലിനെ കേന്ദ്ര കഥാപാത്രമാക്കി പൃഥ്വിരാജ് സംവിധാനം ചെയ്ത ലൂസിഫര്‍ പല റെക്കോര്‍ഡുകളും ഭേദിച്ച് ബോക്സ് ഓഫീസ് വിജയം ആയി മാറിയിരുന്നു. തുടര്‍ന്ന് ചിത്രത്തിന്റെ രണ്ടാം ഭാഗം എമ്പുരാനും പ്രഖ്യാപിച്ചു. മമ്മൂട്ടിയെ നായകനാക്കി ഒരു ചിത്രം ചെയ്യണമെന്ന ആഗ്രഹവും പറഞ്ഞു. ഇപ്പോഴിതാ തന്നിലെ സംവിധാന സ്വപ്‌നങ്ങളെ കുറിച്ച് കൂടുതല്‍ മനസു തുറന്നു സംസാരിച്ചിരിക്കുകയാണ് പൃഥ്വി.
“എപ്പോഴും സിനിമ സംവിധാനം ചെയ്യുക എന്നത് സാധ്യമല്ല. ഫഹദ്, ദുല്‍ഖര്‍, നിവിന്‍ എന്നിവരെ സംവിധാനം ചെയ്യാന്‍ ഞാന്‍ ആഗ്രഹിക്കുന്നു. പക്ഷെ ഞാന്‍ അടിസ്ഥാനപരമായി ഒരു നടനാണ്. എനിക്ക് താല്‍പ്പര്യമുണ്ടെങ്കില്‍ പോലും ഒന്നിനുപുറകെ ഒന്നായി സിനിമകള്‍ സംവിധാനം ചെയ്യാന്‍ കഴിയില്ല.” ടൈംസ് ഓഫ് ഇന്ത്യയുമായുള്ള അഭിമുഖത്തില്‍ പൃഥ്വി പറഞ്ഞു.
Read more
ബ്ലെസി സംവിധാനം ചെയ്യുന്ന ആടുജീവിതത്തിനായുള്ള തയ്യാറെടുപ്പുകള്‍ക്കായി സിനിമയില്‍ നിന്നും ഇടവേളയെടുത്തിരിക്കുകയാണ് പൃഥ്വി. ശരീരഭാരം കുറയ്ക്കുന്നതിനുള്ള ശ്രമങ്ങളിലാണ് താരം. താടിയും വളര്‍ത്തുന്നുണ്ട്. ഈ ചിത്രം പൂര്‍ത്തിയാക്കിയതിന് ശേഷമേ അടുത്ത ചിത്രത്തിലേക്ക് പൃഥ്വി കടക്കൂ. അയ്യപ്പനും കോശിയുമാണ് ഷൂട്ടിംഗ് പൂര്‍ത്തിയായി റിലീസിന് തയ്യാറെടുക്കുന്ന പൃഥ്വി ചിത്രം.
