‘സത്യം പറഞ്ഞാ വിശ്വസിക്കുവോ?’ ധൈര്യപൂര്‍വ്വം തിയേറ്ററില്‍ പോയി കാണാവുന്ന അടിപൊളി പടം: ജോജു ജോര്‍ജ്ജ്

ജി. പ്രജിത്തിന്റെ സംവിധാനത്തില്‍ ബിജു മേനോനും സംവൃത സുനിലും പ്രധാന വേഷങ്ങളിലെത്തിയ ചിത്രം സത്യം പറഞ്ഞാ വിശ്വസിക്കുവോ തിയേറ്ററുകളില്‍ മികച്ച പ്രതികരണം നേടി മുന്നേറുകയാണ്. നാട്ടിന്‍പുറത്തിന്റെ രസങ്ങളും ഓര്‍മ്മകളും സമ്മാനിക്കുന്ന ഒരു റിയലിസ്റ്റിക് ചിത്രമാണിതെന്നാണ് പ്രേക്ഷക പ്രതികരണം. ഇപ്പോഴിതാ ചിത്രത്തെ പ്രശംസിച്ച് രംഗത്ത് വന്നിരിക്കുകയാണ് നടന്‍ ജോജു ജോര്‍ജ്ജ്. സത്യം പറഞ്ഞാ വിശ്വസിക്കുവോ?’ ധൈര്യപൂര്‍വം തിയേറ്ററില്‍ പോയി കാണാവുന്ന അടിപൊളി പടമാണെന്ന് ഫെയ്‌സ്ബുക്കില്‍ പങ്കുവെച്ച വീഡിയോയില്‍ ജോജു പറഞ്ഞു.

‘സത്യം പറഞ്ഞാ വിശ്വസിക്കുവോ നമ്മുടെ ബിജുവേട്ടന്റെ പുതിയ സിനിമ റിലീസ് ചെയ്തു. അദ്ദേഹം വളരെ സന്തോഷത്തിലാണ്. അടിച്ചു ഹിറ്റടിച്ചു. അതില്‍ സുധി കോപ്പയുണ്ട്, നമ്മടെ ചങ്ക് അവന്‍ വളരെ ഗംഭീരമാക്കി. എല്ലാവരും കാണണം. കുറച്ചു ദിവസങ്ങള്‍ക്ക് ശേഷം ആള്‍ക്കാരെ തിയേറ്ററുകളിലേക്ക് എത്തിച്ച സിനിമയാണ്. ഈ ചിത്രം നിങ്ങള്‍ക്ക് ധൈര്യപൂര്‍വം വിശ്വാസപൂര്‍വം തിയേറ്ററില്‍ പോയി കാണാവുന്ന അടിപൊളി പടമാണ്. എല്ലാവരും തിയേറ്ററില്‍ പോയി ചിത്രം കാണുക.’ ജോജു പറഞ്ഞു.

ബിജു മേനോനും സംവൃതയ്ക്കും പുറമേ അലന്‍സിയര്‍, സൈജു കുറുപ്പ്, സുധി കോപ്പ, സുധീഷ്, ശ്രീകാന്ത് മുരളി, വെട്ടുക്കിളി പ്രകാശ്, വിജയകുമാര്‍, ദിനേശ് പ്രഭാകര്‍, മുസ്തഫ, ബീറ്റോ, ശ്രീലക്ഷ്മി, ശ്രുതി ജയന്‍ തുടങ്ങിയവരും ചിത്രത്തിലുണ്ട്.ഒരു വടക്കന്‍ സെല്‍ഫിക്കു ശേഷം ജി. പ്രിജിത്ത് സംവിധാനം ചെയ്യുന്ന ചിത്രം ഗ്രീന്‍ ടിവി എന്റര്‍ടെയിനര്‍, ഉര്‍വ്വശി തിയേറ്റേഴ്‌സ് എന്നിവയുടെ ബാനറില്‍ രമാദേവി, സന്ദീപ് സേനന്‍, അനീഷ് എം തോമസ് എന്നിവര്‍ ചേര്‍ന്നാണ് നിര്‍മ്മിക്കുന്നത്. ഛായാഗ്രഹണം ഷഹനാദ് ജലാല്‍. രഞ്ജന്‍ എബ്രഹാം എഡിറ്റിങ്ങും ഷാന്‍ റഹമാന്‍ സംഗീത സംവിധാനവും നിര്‍വ്വഹിച്ചിരിക്കുന്നു.