ഹോട്ട്സ്റ്റാര്‍ സ്‌പെഷ്യല്‍സ് അവതരിപ്പിക്കുന്ന ത്രില്ലിംഗ് സീരീസായ “ആര്യ”യ്ക്ക് പ്രേക്ഷകരില്‍ നിന്ന് മികച്ച പ്രതികരണമാണ് ലഭിച്ചത്. സുസ്മിതാ സെന്‍, ചന്ദ്രചൂര്‍ സിംഗ് എന്നിവര്‍ കേന്ദ്ര കഥാപാത്രങ്ങളെ അവതരിപ്പിക്കുന്ന സീരീസിന് 9 എപ്പിസോഡുകളാണുള്ളത്. മയക്കുമരുന്നു ബിസിനസുമായി ബന്ധപ്പെട്ടു നില്‍ക്കുന്നൊരു കുടുംബമാണ് ആര്യയുടേത്. ബിസിനസ് സംബന്ധപ്പെട്ട പ്രശ്‌നത്തില്‍ ഭര്‍ത്താവ് കൊല്ലപ്പെടുകയും കുടുംബത്തിന്റെയും ബിസിനസിന്റെയും ഉത്തരവാദിത്വം ഏറ്റെടുക്കേണ്ടി വരികയും ചെയ്യുന്ന സാഹചര്യമാണ് ആര്യ പറയുന്നത്. ജൂണില്‍ അവതരിപ്പിച്ചതു മുതല്‍ ലോക്ക്ഡൗണിലെ ഏറ്റവും ജനപ്രിയ ഡിജിറ്റല്‍ ഷോയായി ഇത് മാറി.
പ്രേക്ഷകരില്‍ നിന്നും നിരൂപകരില്‍ നിന്നും ഒരുപോലെ പ്രശംസയാണ് ഈ ഷോയ്ക്ക് ലഭിച്ചു കൊണ്ടിരിക്കുന്നത്. രാം മധ്‌വാനിയുടെ സംവിധാനത്തില്‍ പിറന്ന ഷോ പ്രേക്ഷകരുടെ ആവശ്യപ്രകാരം 6 ഭാഷകളിലേക്ക് കൂടി അവതരിപ്പിച്ചിരിക്കുകയാണ്. മലയാളം, മറാഠി, തമിഴ്, തെലുങ്ക്, ബംഗാളി, കന്നഡ ഭാഷകളിലേക്കാണ് ഷോ മൊഴി മാറ്റിയിരിക്കുന്നത്. അവരവരുടെ ഭാഷകളില്‍ ഷോകള്‍ കാണാന്‍ ഇഷ്ടപ്പെടുന്നവര്‍ക്കു വേണ്ടിയാണ് ഇത് പ്രാദേശിക ഭാഷകളില്‍ ലഭ്യമാക്കിയിരിക്കുന്നത്. ഡിസ്‌നി+ ഹോട്ട്സ്റ്റാര്‍ വിഐപിയില്‍ 2020 സെപ്റ്റംബര്‍ 6 മുതല്‍ ഡബ് ചെയ്ത പതിപ്പുകള്‍ ലഭ്യമാണ്.
“ആര്യ സൃഷ്ടിച്ചപ്പോള്‍ അത് സ്‌പെഷ്യലാണെന്ന് ഞങ്ങള്‍ക്ക് അറിയാമായിരുന്നു. രാജ്യത്തിന്റെ വിവിധ സംസ്ഥാനങ്ങളിലുള്ളവര്‍ അവരുടെ ഭാഷയില്‍ ഇത് കാണാന്‍ ആഗ്രഹിക്കുന്നു എന്ന് അറിയുന്നത് ഞങ്ങളെ കൂടുതല്‍ എളിമയുള്ളവരാക്കുന്നു. വൈവിദ്ധ്യങ്ങള്‍ നിറഞ്ഞ നമ്മുടെ പോലുള്ള രാജ്യത്ത്, 6 ഭാഷകളില്‍ വരെ നമ്മുടെ സൃഷ്ടികളെ അവതരിപ്പിക്കാനുള്ള അവസരമാണുള്ളത്. സ്വന്തം ഭാഷയില്‍ ആസ്വദിക്കുമ്പോള്‍ പ്രേക്ഷകര്‍ക്ക് കഥയുമായി കൂടുതല്‍ കണക്റ്റഡാകാന്‍ കഴിയുമെന്നാണ് ഞാന്‍ കരുതുന്നത്. ഹിന്ദിയില്‍ നിന്ന് ലഭിച്ചതു പോലുള്ള പ്രതികരണം ലഭിക്കുമെന്നും ഞാന്‍ വിശ്വസിക്കുന്നു” – രാം മധ്വാനി പറഞ്ഞു.
Read more
മുന്‍ മിസ് യൂണിവേഴ്സും നടിയുമായ സുസ്മിതാ സെന്‍, 90-കളിലെ പ്രിയ അഭിനേതാവ് ചന്ദ്രചൂര്‍ സിംഗ് എന്നിവര്‍ അഭിനയത്തിലേക്ക് മടങ്ങി വന്ന വെബ് സീരീസാണിത്. നമിത് ദാസ്, സിഖന്ദര്‍ ഖേര്‍, ജയന്ത് കൃപലാനി, സൊഹെയ്ലാ കപൂര്‍, സുഗന്ദാ ഗാര്‍ഗ്, മായാ സരീന്‍, വിശ്വജീത് പ്രധാന്‍, മനീഷ് ചോധരി തുടങ്ങിയവരാണ് ഇതില്‍ അഭിനയിച്ചിരിക്കുന്നത്. രാം മധ്വാനി, സന്ദീപ് മോദി, വിനോദ് റാവത്ത് എന്നിവരാണ് ഇതിന്റെ അണിയറയില്‍. രാം മധ്വാനി ഫിലിംസ്, എന്‍ഡമോള്‍ ഷൈന്‍ എന്നിവര്‍ ചേര്‍ന്നാണ് ഇത് നിര്‍മ്മിച്ചിരിക്കുന്നത്. പോപ്പുലര്‍ ഡച്ച് ഡ്രാമയായ പെനോസയുടെ ഔദ്യോഗിക അഡാപ്‌റ്റേഷനാണ് ആര്യ.
