കപില്‍ദേവായി രണ്‍വീറിന്റെ വേഷപ്പകര്‍ച്ച; ’83’ യിലെ ലുക്ക് പുറത്തുവിട്ട് താരം

ബോളിവുഡില്‍ ബയോപിക്കുകളുടെ കാലമാണ്. ഇന്ത്യ കണ്ട എക്കാലത്തെയും മികച്ച ഓള്‍റൗണ്ടര്‍ ആയ കപില്‍ദേവിന്റെയും ബയോപിക് ഇപ്പോള്‍ അണിയറയില്‍ ഒരുങ്ങുകയാണ്. 83 എന്നു പേരിട്ടിരിക്കുന്ന ചിത്രത്തില്‍ രണ്‍വീര്‍ സിംഗാണ് കപിലായി വേഷമിടുന്നത്. ഇപ്പോഴിതാ ചിത്രത്തിലെ തന്റെ ലുക്ക് പങ്കുവെച്ചിരിക്കുകയാണ് താരം. കപില്‍ദേവിനോട് സാമ്യം തോന്നുന്ന വിധത്തിലാണ് രണ്‍വീറിന്റെ മേക്കോവര്‍.

തന്റെ ജന്മദിനത്തിലാണ് ആരാധകര്‍ക്കായി രണ്‍വീര്‍ ലുക്ക് പങ്കുവച്ചത്. ‘എന്റെ പ്രത്യേക ദിനത്തില്‍ ഹരിയാന ഹറികൈന്‍, കപില്‍ദേവിനെ നിങ്ങള്‍ക്കായി അവതരിപ്പിക്കുന്നു,’ രണ്‍വീര്‍ കുറിച്ചു. ഇപ്പോള്‍ ബ്രിട്ടനിലാണ് ചിത്രത്തിന്റെ ഷൂട്ടിംഗ് നടക്കുന്നത്. രണ്‍വീറിന്റെ ഭാര്യ ദീപിക പദുക്കോണും ചിത്രത്തില്‍ കപിലിന്റെ ഭാര്യ റോമി ഭാട്ടിയയുടെ വേഷത്തിലെത്തുന്നുണ്ട്.

1983- ലെ ലോക കപ്പ് വിജയത്തെ ചുറ്റിപ്പറ്റിയാണ് ചിത്രത്തിന്റെ പ്രമേയം. ലോര്‍സ്ഡില്‍ അന്ന് കപിലിന്റെ ചെകുത്താന്മാര്‍ ക്രിക്കറ്റ് ലോക കപ്പ് ഉയര്‍ത്തി ഇന്ത്യയുടെ യശസ് ഉയര്‍ത്തി. തമിഴ് നടന്‍ ജീവയും ചിത്രത്തില്‍ അഭിനയിക്കുന്നുണ്ട്. ചിത്രത്തില്‍ ഇന്ത്യയുടെ മുന്‍ ക്യാപ്റ്റന്‍ കൃഷ്ണമാചാരി ശ്രീകാന്തായിട്ടാണ് ജീവ എത്തുന്നത്. 1981 മുതല്‍ 1993 വരെ ഇന്ത്യയ്ക്കു വേണ്ടി കളിച്ചിട്ടുള്ള ശ്രീകാന്ത് ആക്രമണകാരിയായ ഓപ്പണിങ്ങ് ബാറ്റ്‌സ്മാനായാണ് അറിയപ്പെടുന്നത്.

മധു മന്‍ടേന നിര്‍മ്മിക്കുന്ന ചിത്രം കബീര്‍ ഖാനാണ് സംവിധാനം ചെയ്യുന്നത്. ചിരാഗ് പാട്ടില്‍, ഹാര്‍ദി സന്ധു, ആമി വിര്‍ക്ക്, സാക്യുബ് സലീം, പങ്കജ് ത്രിപാഠി, സര്‍താജ് സിംഗ്, താഹിര്‍ രാജ് ബാസിന്‍ എന്നിവരാണ് ചിത്രത്തിലെ മറ്റു കഥാപാത്രങ്ങളെ അവതരിപ്പിക്കുന്നത്. 2020 ഏപ്രില്‍ 10- ന് ചിത്രം പുറത്തിറങ്ങും.