ഷീല കണ്ണന്താനം പ്രധാനമന്ത്രിക്ക് വീട്ടിൽ സ്നേഹവിരുന്നൊരുക്കാൻ ഇരുന്നതാ...! പക്ഷേ എന്തുചെയ്യാനാ; ട്രോളുമായി സോഷ്യൽ മീഡിയ

കഴിഞ്ഞ കുറെ കാലങ്ങളായി സോഷ്യൽ മീഡിയയിൽ ട്രോളിനും ഡബ്‌സ്‌ സ്മാഷിനും വഴിയൊരുക്കിയ തുറന്നു പറച്ചിലായിരുന്നു കേന്ദ്ര മന്ത്രി അൽഫോൻസ് കണ്ണന്താനത്തിന്റെ ഭാര്യ ഷീല കണ്ണന്താനത്തിന്റേത്.

എന്നാൽ ഇപ്പോൾ വീണ്ടും പുതിയ വെളിപ്പെടുത്തലുകൾ നടത്തിയ ഷീലയുടെ വാക്കുകൾ സമൂഹ മാധ്യമങ്ങളിൽ കത്തിപ്പടരുകയാണ്. പ്രധാനമന്ത്രിക്കും മറ്റ് കേന്ദ്ര മന്ത്രിമാർക്കും ക്രിസ്മസ് അനുബന്ധിച്ച് തന്റെ വീട്ടിൽ സ്നേഹ വിരുന്നൊരുക്കാൻ ഇരുന്നതാണെന്നാണ് ഷീല കണ്ണന്താനത്തിന്റെ ഭാഷ്യം.

ഷീല കണ്ണന്താനം മനോരമയ്ക്ക് നൽകിയ അഭിമുഖത്തിലാണ് ഇക്കാര്യം വ്യക്തമാക്കിയത്. ഇത്തവണത്തെ ക്രിസ്മസ് ആഘോഷം എങ്ങനെയെന്ന ചോദ്യത്തിനാണ് മിസിസ് കണ്ണന്താനം ഇത്തരത്തിൽ മറുപടി നൽകിയത്.

ഉത്തരത്തിന്റെ പൂർണ്ണ രൂപം ഇതാ,

ആൽഫി കേന്ദ്രമന്ത്രിയായതിന് ശേഷമുള്ള ആദ്യ ക്രിസ്മസാണ്. അത് ആഘോഷമാക്കാനായിരുന്നു ആദ്യം വിചാരിച്ചിരുന്നത്. പ്രധാനമന്ത്രിയുൾപ്പടെയുള്ള എല്ലാമന്ത്രിമാർക്കും വീട്ടിൽ സ്നേഹവിരുന്നൊരുക്കാൻ പരിപാടിയുണ്ടായിരുന്നു. ഓരോരുത്തർക്കും പ്രത്യേകം സമ്മാനങ്ങൾ നൽകണമെന്നുമുണ്ടായിരുന്നു.

എന്നാൽ ഓഖി ദുരന്തത്തെതുടർന്ന് അത് വേണ്ടെന്നുവച്ചു. ഇത്രയും ആളുകൾ ദുരിതം അനുഭവിക്കുമ്പോൾ നമ്മൾ ആഘോഷിക്കുന്നത് ശരിയല്ലല്ലോ. എങ്കിലും വീട്ടിൽ ആശംസകൾക്കുമായി വരുന്നവർക്ക് ക്രിസ്മസ് സമ്മാനങ്ങൾ നൽകുന്ന പതിവ് രീതിയിൽ മാറ്റമില്ല.

ഇത്തവണത്തെ ക്രിസ്മസ് കുടുംബത്തെ സംബന്ധിച്ച് ഏറെ പ്രിയപ്പെട്ടതാണ്. പതിനഞ്ചുവർഷത്തിന് ശേഷം രണ്ടുമക്കളും മരുമക്കളും ഒരുമിച്ചുള്ള ക്രിസ്മസാണ്. രണ്ടുമക്കളും വിദേശത്ത് പഠിക്കാൻ പോയതിൽ പിന്നെ കുടുംബത്തിലുള്ള എല്ലാവരും ഒരുമിച്ച് ക്രിസ്മസ് ആഘോഷിച്ചിട്ടില്ല. ഒരാൾ വരുമ്പോൾ മറ്റെയാൾ കാണില്ല. ഇത്തവണ എല്ലാവരുമുള്ളതിന്റെ സന്തോഷമുള്ളതായും അവർ പറഞ്ഞു.