മുഖംമൂടി ധരിച്ച് കൈയിൽ വടി പിടിച്ച് നരേന്ദ്രമോദിയും അമിത് ഷായും; ജെ.എൻ.യു അക്രമത്തിന്റെ പശ്ചാത്തലത്തിൽ പ്രചാരം നേടി ഒറിജിത് സെന്നിന്റെ വര

ജെ.എൻ.യു അക്രമത്തിന്റെ പശ്ചാത്തലത്തിൽ പ്രധാനമന്ത്രി നരേന്ദ്രമോദിയെയും കേന്ദ്ര ആഭ്യന്തര മന്ത്രി അമിത് ഷായെയും വിമർശനാത്മകമായ രീതിയിൽ അവതരിപ്പിക്കുന്ന ചിത്രം വലിയ പ്രചാരമാണ് നേടിയിരിക്കുന്നത്. പ്രശസ്ത ഗ്രാഫിക് ആർട്ടിസ്റ്റായ ഒറിജിത് സെന്നാണ് ഈ ചിത്രം വരച്ചിരിക്കുന്നത്. മുഖംമൂടി ധരിച്ച് കൈയിൽ വടി പിടിച്ച് നിൽക്കുന്ന മോദിയെയും അമിത് ഷായെയുമാണ് ചിത്രത്തിൽ കാണുന്നത്.

https://www.facebook.com/orijit.sen/posts/10158123962487718

ഡൽഹിയിലെ ജവഹർലാൽ നെഹ്‌റു സർവകലാശാലയിൽ ഇന്നലെ രാത്രി മുഖംമൂടി ധരിച്ച അക്രമിസംഘം സർവകലാശാല കാമ്പസില്‍ ആയുധവും ഉപയോഗിച്ച് വിദ്യാർത്ഥികൾക്ക് നേരെ അക്രമം നടത്തിയ സംഭവം ലോക മനഃസാക്ഷിയെ ഞെട്ടിച്ചിരിക്കുകയാണ്. ഈ സാഹചര്യത്തിലാണ് ഒറിജിത് സെനിന്റെ വരയ്ക്ക് സോഷ്യൽ മീഡിയയിൽ പ്രചാരം ലഭിച്ചിരിക്കുന്നത്. “ഗുണ്ടകൾ” എന്ന തലക്കെട്ടോടെയാണ് ഒറിജിത് സെൻ തന്റെ ഫെയ്സ്ബുക്കിൽ ഈ ഗ്രാഫിക് ചിത്രം പങ്ക് വെച്ചിരിക്കുന്നത്.

ജെ.എൻ.യുവിൽ നടന്ന അക്രമത്തിൽ 34 പേർക്ക് പരിക്കേൽക്കുകയും ചികിത്സയ്ക്കായി ഇന്നലെ രാത്രി തന്നെ ഇവരെ എയിംസിൽ പ്രവേശിപ്പിക്കുകയും ചെയ്തിരുന്നു. സംഘപരിവാർ ശക്തികളാണ് അക്രമങ്ങൾക്ക്‌ പിന്നിൽ എന്നാണ് ആരോപണം. വലിയ രീതിയിലുള്ള പ്രതിഷേധമാണ് ജെ.എൻ.യു വിദ്യാർത്ഥികൾക്ക് നേരെ ഉണ്ടായ അക്രമത്തിൽ ലോകമെമ്പാടും ഉണ്ടായിരിക്കുന്നത്.

ഇന്ത്യൻ ഗ്രാഫിക് ആർട്ടിസ്റ്റും ഡിസൈനറുമാണ് ഒറിജിത് സെൻ. അദ്ദേഹത്തിന്റെ ഗ്രാഫിക് നോവൽ റിവർ ഓഫ് സ്റ്റോറീസ്, 1994- ൽ കൽപ്പവ്രിഷ് പ്രസിദ്ധീകരിച്ചു, ഇന്ത്യയിലെ ആദ്യത്തെ ഗ്രാഫിക് നോവലായാണ് ഇത് കണക്കാക്കപ്പെടുന്നത്.