കേരളത്തിൽ ഒരു ഡ്രൈ ചിൽ കോൾഡ് സ്റ്റോറേജ് ലോജിസ്റ്റിക് പാർക്ക് ആരംഭിക്കുന്നതിന് പ്രമുഖ ലോജിസ്റ്റിക്‌സ് സംരംഭമായ സെല്ല സ്‌പേസ് ലിമിറ്റഡിന് സർക്കാർ അംഗീകാരം ലഭിച്ചു. കൊച്ചിയിലെ എടയാർ വ്യവസായ മേഖലയിലാണ് പാർക്ക് ആരംഭിക്കുക. 60 കോടി രൂപയാണ് മുതൽമുടക്ക്. കേരളത്തിന് പുറത്ത് ലോജിസ്റ്റിക്‌സ് പാർക്കുകൾ പ്രവർത്തിപ്പിച്ചു വരുന്ന കമ്പനിയുടെ സംസ്ഥാനത്തെ ആദ്യ സംരംഭമാണ് ഇത്.
ഡ്രൈ ചിൽഡ് കോൾഡ് സ്റ്റോറേജ്, റോഡ് സൗകര്യങ്ങൾ, അഗ്നി സുരക്ഷാ സംവിധാനങ്ങൾ, പൊതുവായ ഊർജ്ജ സംവിധാനം, ഉയർന്ന സുരക്ഷാ സേവനം തുടങ്ങിയ കാര്യങ്ങൾ ഉൾപ്പെട്ടതാണ് ലോജിസ്റ്റിക്‌സ് പാർക്ക്. റീപാക്കിംഗ്, ലേബലിംഗ്, സ്പെയർ പാർട്ട് അസംബ്ലിംഗ്, ട്രാസ്പോർട്ടേഷൻ സൗകര്യങ്ങൾ തുടങ്ങിയവയും ഇവിടെ ഏർപ്പെടുത്തുമെന്ന് കമ്പനി അറിയിച്ചു. ഇതിന്റെ പ്രൊമോട്ടർ എസ്. രാജ്‌കുമാറിന്റെ കീഴിൽ നേരത്തെ പ്രവർത്തിച്ചിരുന്ന കമ്പനിയാണ് ശ്രീ ശക്തി പേപ്പർ മിൽസ്.
Read more
വ്യവസായ എസ്റേറ്റുകളിലെ അഞ്ചു ശതമാനം സ്ഥലം സംസ്ഥാന സർക്കാർ ലോജിസ്റ്റിക് സേവനങ്ങൾക്കായി നീക്കി വെച്ചിട്ടുണ്ട്. നിരവധി തൊഴിൽ അവസരങ്ങൾ ഇത്തരം സംരംഭങ്ങൾ വഴി വികസിപ്പിക്കാനാകും. സംസ്ഥാനത്തിനകത്ത് ഇത്തരം പാർക്കുകൾ തുറക്കുന്നത് വഴി ചരക്ക് നീക്കത്തിനുള്ള ചെലവുകൾ ഗണ്യമായി കുറയ്ക്കാൻ കഴിയുമെന്ന് സർക്കാർ പ്രതീക്ഷിക്കുന്നു.
