​ഡൽഹി സീൻ ഡാർക്കാകും, അമിത് ഷായുടെ രാജി ചോദിച്ച് അഭിജിത് ദീപ്‌കെ; വരുന്നത് സിജെപിയുടെ തീപ്പൊരി പ്രക്ഷോഭം

Special story: saj kurian

കേന്ദ്ര വിദ്യാഭ്യാസ മന്ത്രിയായിരുന്ന ധർമ്മേന്ദ്ര പ്രധാന്റെ രാജിക്ക് പിന്നാലെ കേന്ദ്ര സർക്കാരിനെതിരെ വീണ്ടും ആഞ്ഞടിച്ച് കോക്രോച്ച് ജനതാ പാർട്ടി (സിജെപി) സ്ഥാപകൻ അഭിജിത് ദീപ്‌കെ രംഗത്തെത്തിയിരിക്കുകയാണ്. കേന്ദ്ര ആഭ്യന്തര മന്ത്രി അമിത് ഷാ അടിയന്തരമായി രാജിവെക്കണമെന്ന ദീപ്‌കെയുടെ പുതിയ പ്രസ്താവന വലിയ രാഷ്ട്രീയ വിവാദങ്ങൾക്കാണ് തിരികൊളുത്തിയിരിക്കുന്നത്. തികച്ചും പ്രകോപനപരമായ ഈ പ്രസ്താവനകൾ, വരും നാളുകളിൽ സിജെപിയുടെ നേതൃത്വത്തിൽ ബിജെപി സർക്കാരിനെതിരെ നടക്കാൻ പോകുന്ന വലിയ ജനകീയ പ്രക്ഷോഭങ്ങളുടെയും സമരങ്ങളുടെയും വ്യക്തമായ സൂചനയായാണ് വിലയിരുത്തപ്പെടുന്നത്.

​കഴിഞ്ഞ ദിവസം മാധ്യമങ്ങളോട് സംസാരിക്കവെയാണ് സർക്കാരിനെയും ബിജെപി നേതൃത്വത്തെയും കടന്നാക്രമിച്ച് അഭിജിത് ദീപ്‌കെ ഈ കാര്യങ്ങൾ വ്യക്തമാക്കിയത്. ഡൽഹി ജന്തർ മന്തറിൽ സമാധാനപരമായി പ്രതിഷേധിച്ച വിദ്യാർഥികൾക്കെതിരെ നടന്ന ക്രൂരമായ പോലീസ് അതിക്രമം അമിത് ഷായുടെ നേരിട്ടുള്ള നിർദേശപ്രകാരമാണെന്നാണ് ദീപ്‌കെയുടെ പ്രധാന ആരോപണം. വിദ്യാർഥികളുടെ ചോര വീഴ്ത്തിയതിന് അമിത് ഷാ മറുപടി പറയണമെന്നും അടിയന്തരമായി അദ്ദേഹം രാജിവെക്കണമെന്നും ദീപ്‌കെ ആവശ്യപ്പെട്ടു.
​ഡൽഹി പോലീസ് വിദ്യാർഥികളെ കുടുക്കാൻ ഗൂഢാലോചന നടത്തിയെന്നും അദ്ദേഹം ആരോപിക്കുന്നുണ്ട്. പ്രതിഷേധത്തിന് മുൻപായി കല്ലുകൾ നിറച്ച ട്രക്കുകൾ പോലീസ് അവിടെ എത്തിച്ചിരുന്നുവെന്നും, വിദ്യാർഥികൾ കല്ലെറിഞ്ഞു എന്ന് വരുത്തിത്തീർക്കാൻ പോലീസും ചില രാഷ്ട്രീയ ഗുണ്ടകളും ചേർന്ന് നടത്തിയ നാടകമാണിതെന്നും അദ്ദേഹം തുറന്നടിച്ചു. കൂടാതെ, തന്നെ ബിജെപിയിൽ ചേരാൻ ഭീഷണിപ്പെടുത്തിയെന്നും, വഴങ്ങിയില്ലെങ്കിൽ കുടുംബത്തെ അപായപ്പെടുത്തുമെന്ന് പറഞ്ഞതായും അദ്ദേഹം വെളിപ്പെടുത്തുകയുണ്ടായി. ഡൽഹി പോലീസിനെ രൂക്ഷമായി പരിഹസിച്ചതും, രാജ്യത്തെ ആഭ്യന്തര മന്ത്രിയെ നേരിട്ട് വെല്ലുവിളിച്ചതും കേന്ദ്ര നേതൃത്വത്തിനെതിരെയുള്ള സിജെപിയുടെ തുറന്ന പോരിന്റെ തുടക്കമായാണ് കാണുന്നത്.

​വിദ്യാർത്ഥികൾക്കെതിരെയുള്ള കേസുകൾ പിൻവലിച്ചില്ലെങ്കിൽ രാജ്യവ്യാപകമായി കർഷകരെയും യുവാക്കളെയും അണിനിരത്തി വൻ സമരം സംഘടിപ്പിക്കുമെന്ന് സിജെപി കൃത്യമായ മുന്നറിയിപ്പ് നൽകിയിട്ടുണ്ട്. തുടർച്ചയായുള്ള ഈ ആരോപണങ്ങളും വെല്ലുവിളികളും കേവലം വാക്കുകളിൽ ഒതുങ്ങുന്നതല്ല. നീറ്റ് ചോദ്യപേപ്പർ ചോർച്ചയിൽ തുടങ്ങിയ സമരം ഇപ്പോൾ എത്തിനിൽക്കുന്നത് സർക്കാരിനെതിരെയുള്ള വലിയൊരു കൊടുങ്കാറ്റിന്റെ സൂചനകളിലേക്കാണ്. ദീപ്‌കെയുടെ ഈ പ്രസ്താവനകൾ വരും നാളുകളിൽ സിജെപിയുടെയും മറ്റ് യുവജന സംഘടനകളുടെയും നേതൃത്വത്തിൽ നടക്കുന്ന വിട്ടുവീഴ്ചയില്ലാത്തതും ശക്തവുമായ പ്രക്ഷോഭങ്ങളിലേക്ക് രാജ്യത്തെ നയിക്കുമെന്ന കാര്യത്തിൽ സംശയമില്ല.